نیو یارک : وفاقی وزیر داخلہ محسن نقوی نے کہا ہے کہ پاک چین دوستی اقوام عالم کیلئے مثال ہے، چینی شہریوں کی سیکیورٹی کے فول پروف انتظامات کئے ہیں۔ تفصیلات کے مطابق وفاقی وزیر داخلہ محسن نقوی نے چینی ہم منصب کیو آئی یانجن سے نیویارک میں اقوام متحدہ کے پیپلز ری پبلک آف چائنہ مشن کے دفتر میں ملاقات کی جس میں پاک چین تعلقات ، سیکیورٹی امور ،قانون نافذ کرنیوالے اداروں ،چین کے تعاون بارے امور ،ٹریننگ و جدید آلات و ٹیکنالوجی کے استعمال پر تبادلہ خیال کیا گیا۔
پیپلز ری پبلک آف چائنہ کے ہم منصب کیوائی یانجن نے اسلام آباد میں غیر ملکیوں خصوصا چینی شہریوں کی حفاظت کیلئے ایس پی یو کے قیام کے اقدام کو سراہا اور ایس پی یو کی ٹریننگ اور دیگر امور میں بھرپور تعاون کی یقین دہانی کرائی۔انہوں نے کہا کہ پاکستان اور چین ہر موسم کے دوست ہیں، دونوں کی دوستی فولاد سے زیادہ مضبوط ہے۔
اس موقع پر وفاقی وزیرداخلہ محسن نقوی نے داسو میں پیش آنے والے افسوسناک واقعہ پر ہونے والی پیشرفت سے آگاہ کیا، کیوآئی یانجن نے کیس پر ہونیوالی پیش رفت پر اطمینان کا اظہار کرتے ہوئے کہا کہ پاکستانی اداروں نے محنت اور پروفیشنل انداز میں اس کیس کو ٹریس کیا۔
وزیر داخلہ نے کہا کہ پیپلز ری پبلک آف چائنہ کی وزارت داخلہ کا ایڈوائزی گروپ جلد پاکستان کا دورہ کرے گا، پاک چین دوستی اقوام عالم کیلئے مثال ہے جس پر ہمیں فخر ہے، چینی شہریوں کی سکیورٹی کے فول پروف انتظامات کئے ہیں۔اس موقع پر چینی ہم منصب نے محسن نقوی کو ستمبر میں چائنہ میں ہونیوالی گلوبل سکیورٹی فورم میں شرکت کی دعوت دی جسے انہوں نے قبول کرلیا اور چینی ہم منصب کو بھی دورہ پاکستان کی دعوت دی ۔
