وزیراعظم شہباز شریف نے مالی شمولیت، کیش لیس معیشت کو حکومت کی اولین ترجیح قرار دیتے ہوئے فروغ کیلئے اقدامات مزید تیز کرنے کا حکم دے دیا۔
جمعرات کو وزیراعظم کی زیر صدارت راست بورڈ کا اجلاس ہوا جس میں وفاقی وزیر خزانہ سینیٹر محمد اورنگزیب، وزیر اطلاعات عطا تارڑ، وزیر اقتصادی امور احد خان چیمہ، وزیر انفارمیشن ٹیکنالوجی شزا فاطمہ خواجہ، وزیر مملکت برائے خزانہ بلال اظہر کیانی، گورنر اسٹیٹ بینک، راست بورڈ کے ممبران، سی ای او اور اعلی سرکاری افسران نے شرکت کی۔
بورڈ ارکان نے راست کی کارکردگی پر وزیراعظم کو بریفنگ دیتے ہوئے بتایا کہ راست کے اجرا سے اب تک تقریبا 80 کھرب روپے کی 3 ارب سے زائد ٹرانزیکشنز مکمل ہو چکی ہیں، راست کے صارفین کی تعداد 4کروڑ 80سے تجاوز کر چکی ہے جبکہ ملک بھر کے 53مالیاتی ادارے راست کا حصہ ہیں۔
وزیراعظم کو بتایا گیا کہ راست سٹیٹ بینک کا ادارہ ہے، تاہم ایک ممبر کے علاوہ تمام بورڈ ممبران نجی شعبے سے وسیع تجربے کی بنیاد پر منتخب کئے گئے ہیں۔
اجلاس کو آگاہ کیا گیا کہ ملک بھر میں تمام جی ٹو بی اور بی ٹو جی ادائیگیوں کی راست پر منتقلی ادارے کا وژن ہے، راست کے ذریعے ہر فرد کو محفوظ اور قابل اعتماد ڈیجیٹل ادائیگی کا پلیٹ فارم فراہم کیا گیا ہے۔
وزیراعظم نے نئی ذمہ داریاں سنبھالنے والے ممبران کو مبارکباد پیش کرتے ہوئے کہا کہ امید ہے قومی اہمیت کے حامل اس ادارے کو مزید بہتر انداز میں چلایا جائے گا۔
وزیراعظم نے کہا کہ کیش لیس معیشت اور مالی شمولیت کے فروغ میں راست کا کلیدی کردار ہے، ملک بھر کے کاروباری افراد کو راست پلیٹ فارم کے استعمال کی ترغیب دینے کی کوششیں مزید تیز کی جائیں۔
