لاہور: صدر مسلم لیگ (ن) نواز شریف نے کہا ہے کہ ترقی کرتا ملک گڑھے میں گرا دیا گیا، سڑک پر پھرتے شخص کو کہا گیا آؤ ہم تمہیں انصاف دیں گے،سب جانتے ہیں آئی ایم ایف کو کون لایا؟،فیصلے دینے والوں کو سوچنا ہوگا، عوام کی پرواہ، ریلیف فراہمی کیلئے جو کرنا پڑا کریں۔تفصیلات کے مطابق وزیراعلی پنجاب مریم نواز و صدر مسلم لیگ (ن) نواز شریف کی زیر صدارت اجلاس کا انعقاد ہوا جس میں چیف منسٹر سولر پینل فنانسنگ سکیم سے متعلق امور کا جائزہ لیا گیا۔
اجلاس میں گفتگو کرتے ہوئے سابق وزیراعظم نواز شریف نے کہا کہ بجلی کا بل کوئی ادا نہیں کر سکتا، بجلی غریب لوگوں کیلئے ہی نہیں، ہر ایک کیلئے مصیبت بن چکا ہے۔انہوں نے کہا کہ ہم نے اپنے دور میں لوڈ شیڈنگ ختم کی اور بجلی کا نرخ کو بھی کنٹرول میں رکھا، 2017ء تک بجلی کے بل کم اور ڈالر کا نرخ نیچے تھا تاہم 2018 سے نظر لگی اور غریب پس کر رہ گیا۔
انہوں نے کہا کہ سڑک پر پھرتے شخص کو کہا گیا آؤ ہم تمہیں انصاف دیں گے، پوچھتا ہوں اس ملک کے ساتھ ظلم کرنے کی کیا ضرورت ہے؟ ، ہم نے آئی ایم ایف کو واپس بھیج دیا تھا بعد میں کون لایا ؟ سب کو پتا ہے۔
انہوں نے کہا کہ ملک کے ساتھ اچھا سلوک نہیں کیا جا رہا، ترقی کرتا ہوا ملک گڑھے میں گرا دیاگیا، فیصلے دینے والوں کو اب بھی سوچنا ہو گا، عوام کی پرواہ کریں، ریلیف فراہمی کیلئے جو کرنا پڑا کریں۔
