اسلام آباد: صدر مملکت آصف علی زرداری نے کہا ہے کہ آج کا محفوظ پاکستان ہمارے ہیروز کی عظیم قربانیوں کا نتیجہ ہے، قوم کو کیپٹن محمد سرور شہید کی جرات، استقامت اور عظیم قربانی پر فخر ہے۔
اتوار کو ایوان صدر کے پریس ونگ سے جاری بیان میں آصف علی زرداری نے کیپٹن محمد سرور شہید (نشانِ حیدر)کو 77 ویں برسی پر زبردست خراجِ عقیدت پیش کرتے ہوئے کہا ہے کہ 77 برس قبل آج ہی کے دن کشمیر کی پہلی جنگ میں کیپٹن محمد سرور شہید نے مادرِ وطن کے لیے جان کا نذرانہ پیش کیا۔
انہوں نے کہا کہ۔ صدر مملکت نے کہا کہ پوری قوم کیپٹن محمد سرور شہید کی بہادری اور قربانی کو سلام پیش کرتی ہے، انہوں نے اپنی جان دے کر قومی دفاع کا ناقابلِ فراموش باب رقم کیا۔
صدر آصف علی زرداری نے کہا کہ شہدا کی قربانیاں ملکی دفاع اور قومی استحکام کی بنیاد ہیں اور قوم کیپٹن محمد سرور شہید کی قربانی کو ہمیشہ یاد رکھے گی۔
