الیکشن کمیشن نے بلدیاتی انتخابات کے بروقت انعقاد کیلئے وفاقی حکومت کو قانون سازی کی سفارش کرتے ہوئے کہا ہے کہ لوکل گورنمنٹ نظام ملکی جمہوری اداروں کا اہم ستون، کوئی صوبائی حکومت بلدیاتی انتخابات کے بروقت انعقاد میں سنجیدہ نہیں۔
جاری بیان میں الیکشن کمیشن نے بلدیاتی انتخابات کے بروقت انعقاد کیلئے وفاقی حکومت سے الیکشن ایکٹ 2017کے سیکشن 219میں ترمیم کی سفارش کرتے ہوئے کہا ہے کہ مقامی حکومتوں کی مدت پوری ہونے یا ان کی تحلیل کی صورت میں اسی وقت نافذ لوکل گورنمنٹ قوانین کے تحت بلدیاتی انتخابات کرائے جائیں تاکہ کسی بھی قسم کی قانونی یا انتظامی رکاوٹ پیدا نہ ہو۔
ترجمان نے کہا کہ یہ سفارشات اس لئے بھیجی گئی ہیں کیونکہ ماضی میں یہ دیکھا گیا ہے کہ کوئی بھی حکومت بلدیاتی انتخابات بروقت کرانے میں سنجیدہ نظر نہیں آتی، جس کے باعث مقامی سطح پر جمہوری عمل متاثر ہوتا ہے اور عوام بنیادی سہولیات سے محروم رہتے ہیں۔
الیکشن کمیشن نے واضح کیا ہے کہ بلدیاتی انتخابات کا انعقاد صرف الیکشن کمیشن کی نہیں بلکہ وفاقی اور صوبائی حکومتوں کیساتھ مشترکہ آئینی ذمہ داری ہے، بروقت انتخابات نہ ہونے سے نچلی سطح پر جمہوریت کمزور ہوتی ہے، جس کا براہِ راست نقصان عوام کو پہنچتا ہے۔
ترجمان نے کہا کہ لوکل گورنمنٹ نظام ملکی جمہوری اداروں کا اہم ستون ،مقامی سطح پر عوام کو سہولیات فراہمی، مسائل حل کرنے میں کلیدی کردار ادا کرتا ہے، بلدیاتی اداروں کے بغیر جمہوریت نامکمل ہے، اس لئے ضروری ہے کہ مقامی حکومتوں کے تسلسل اور عوامی نمائندگی کو یقینی بنانے کیلئے واضح اور موثر قانونی فریم ورک تشکیل دیا جائے۔
