ایف آئی اے نے سیالکوٹ ائیر پورٹ پر کارروائی کے دوران جعلی دستاویزات پر بیرون ممالک جانے کی کوشش کرنیوالے 2 مسافر گرفتار کرلئے۔
ترجمان ایف آئی اے کے مطابق گرفتار ملزمان میں محمد سلیم اور طورنگ خالد شامل ہیں۔ ملزم طورنگ خالد فلائٹ نمبر کیو آر631کے ذریعے ورک ویزے پر سائپرس جا رہا تھا، ملزم کے پاسپورٹ پر سائپرس کا جعلی ویزا اور جعلی پروٹیکٹر سٹمپ لگی ہوئی تھی، ملزم نے پسرور کے رہائشی ایجنٹ کو مجموعی طور پر 22لاکھ روپے ادا کر کے جعلی دستاویزات حاصل کی تھیں۔
ترجمان کے مطابق ملزم محمد سلیم فلائٹ نمبر ایف زیڈ 338 سے وزٹ ویزے پر تاجکستان جا رہا تھا، ابتدائی تفتیش کے مطابق ملزم نے غیر قانونی سمندر کے راستے یورپ جانا تھا، ملزمان نے تاجکستان سے بعد ازاں لیبیا کے سمندری راستے سے غیر قانونی یورپ جانا تھا، ملزم نے گوجرانوالہ کے رہائشی ایجنٹ کو مجموعی طور پر 35 لاکھ روپے ادا کئے تھے۔
ترجمان کے مطابق گرفتار ملزمان ایجنٹوں سے رابطے میں تھے۔ ترجمان کے مطابق ملزمان کو ایجنٹوں کی نشاندہی و دیگر کارروائی کیلئے کمپوزٹ سرکل گوجرنوالہ منتقل کر دیا گیا ہے۔
