خیبرپختونخوا حکومت اور پاکستان ریلویز کے مابین تعاون و اشتراک کار بڑھانے پر اتفاق ہوگیا ہے اس حوالے سے وزیراعلیٰ خیبر پختونخوا محمد سہیل آفریدی کی زیر صدارت ریلویز سے متعلق اہم اجلاس ہوا جس میں بتایا گیا کہ کوہاٹ تا خرلاچی 192 کلومیٹر نیا ریلویز ٹریک بچھایا جائیگا منصوبہ پر 642 ملین ڈالر لاگت آئیگی اور منصوبہ دو سال میں مکمل ہوگا۔
وزیراعلیٰ نے کہا کہ کوہاٹ تا خرلاچی ٹرین سروس سے سفری سہولیات کیساتھ تجارتی سرگرمیوں کو فروغ ملے گا، کوہاٹ خرلاچی ٹرین سروس وقت کی اہم ضرورت ہے۔
اجلاس میں خیبر پختونخوا کے مختلف ریلویز ٹریکس پر جدید ٹرینیں چلانے پر بھی غور کیا گیا، وزیراعلیٰ نے متعلقہ حکام کو ریلویز منصوبوں کیلئے ٹائم لائنز کیساتھ پلان تیار کرنے اور دیگر بڑے شہروں میں بھی ٹرینیں چلانے کیلئے اقدامات کی ہدایت کر دی، انہوں نے کہا کہ صوبے کے عوام کے مفاد میں پاکستان ریلویز کو مکمل تعاون فراہم کرینگے، اجلاس میں جمرود تا لنڈی کوتل 32 کلومیٹر ٹریک پر سفاری ٹرین چلانے پر بھی تفصیلی غور و خوص کیا گیا، صوبے کے قدیم و تاریخی ریلویزسٹیشنز کی بحالی، صفائی، تزئین و آرائش اور ٹریکس کے اطراف گرین بیلٹس کی تعمیر پر غور کیا گیا۔
