اے این ایف نے 3 کارروائیوں میں 77لاکھ روپے سے زائد مالیت کی 33.62کلو گرام منشیات برآمد کر کے خاتون سمیت 2 ملزمان کو گرفتار کر لیا۔
ترجمان کے مطابق پہلی کارروائی علامہ اقبال انٹرنیشنل ایئرپورٹ لاہور پر کی گئی جہاں جدہ جانے والے ایک مسافر کے سامان کی تلاشی کے دوران کپڑوں میں جذب کی گئی 14.912 کلو گرام آئس برآمد ہوئی، حکام نے ایک ملزم کو گرفتار کرلیا، دوسری کارروائی جناح انٹرنیشنل ایئرپورٹ کراچی کے کارگو شیڈ میں عمل میں لائی گئی جہاں فلپائن جانیوالے پارسل کی جانچ پڑتال کے دوران کپڑوں میں جذب کی گئی 13.350کلو گرام آئس برآمد ہوئی، حکام کے مطابق یہ منشیات بیرون ملک سمگل کی جا رہی تھی، تاہم خفیہ معلومات کی بنیاد پر کی گئی کارروائی کے نتیجے میں اسمگلنگ کی کوشش ناکام ہوئی۔
تیسری کارروائی ترنول ٹول پلازہ راولپنڈی کے قریب کی گئی جہاں مسافر خاتون کے قبضے سے 4.800کلو گرام چرس برآمد ہوئی۔
حکام کے مطابق خاتون منشیات ایک مقام سے دوسرے مقام منتقل کرنے کی کوشش کر رہی تھی جسے بروقت کارروائی کر کے گرفتار کر لیا گیا۔
ترجمان کے مطابق ملزمان کے خلاف انسداد منشیات ایکٹ 1997کے تحت مقدمات درج کر کے مزید تحقیقات شروع کر دی گئی ہیں۔
