اکیڈمی آف موشن پکچر آرٹس اینڈ سائنسز اور یوٹیوب کے درمیان ایک سٹریٹجک شراکت داری طے پا گئی ہے جس کے تحت ہالی ووڈ کے سب سے بڑے اعزاز آسکر ایوارڈز 2029 سے یوٹیوب پر نشر کئے جائینگے اور آغاز 101ویں آسکر ایوارڈز سے ہو گا۔
اکیڈمی کے سی ای او بل کریمر اور صدر لینیٹ ہال ٹیلر نے اعلان کیا کہ یہ معاہدہ 2033 تک موثر رہے گا جسے ہالی ووڈ کی تاریخ میں ایک بڑی تبدیلی قرار دیا جا رہا ہے۔
مشترکہ بیان میں کہا گیا کہ ہم یوٹیوب کیساتھ ایک ہمہ جہت عالمی شراکت داری پر خوش ہیں جو آسکرز اور اکیڈمی کے سال بھر کے پروگرامز کا مستقبل کا پلیٹ فارم ہوگا۔
بیان میں مزید کہا گیا کہ اکیڈمی ایک بین الاقوامی ادارہ ہے اور یہ شراکت داری دنیا بھر کے ناظرین تک اکیڈمی کے کام کو زیادہ موثر انداز میں پہنچانے میں مدد دیگی جس سے فلم انڈسٹری اور اکیڈمی ممبران دونوں کو فائدہ ہوگا۔
یوٹیوب کے سی ای او نیل موہن نے کہا کہ یہ قدم نئی نسل کے فلمی شائقین کو متاثر کریگا جبکہ آسکرز کی روایات کو بھی برقرار رکھا جائیگا، معاہدے کے تحت دنیا بھر کے ناظرین ریڈ کارپٹ سے لیکر ایوارڈ تقریب اور پس پردہ مناظر تک مکمل تقریب کو یوٹیوب پر براہِ راست دیکھ سکیں گے۔
