صدر آصف زرداری نے قطر کے قومی دن پر امیر قطر و قطری عوام کو مبارکباد دیتے ہوئے کہا ہے کہ خطے و عالمی سطح پر قطر کا مثبت کردار قابل تحسین ہے، پاکستان قطر کیساتھ سرمایہ کاری و تجارت میں تعاون بڑھانے کا خواہاں ہے۔
جاری بیان کے مطابق صدر مملکت نے امیر قطر شیخ تمیم بن حمد الثانی اور قطری عوام کیلئے نیک تمنائوں کا اظہار کرتے ہوئے کہا کہ پاکستان اور قطر کے درمیان قریبی و دیرپا برادرانہ تعلقات مشترکہ اقدار اور باہمی احترام پر مبنی ہیں، افرادی قوت اور عوامی روابط دونوں ممالک کے تعلقات کی بنیاد ہیں امیرِ قطر کی قیادت میں قطر نے نمایاں ترقی اور کامیابیاں حاصل کی ہیں۔
انہوں نے کہا کہ خطے و عالمی سطح پر قطر کا مثبت کردار قابل تحسین ہے، پاکستان قطر کے ساتھ سرمایہ کاری اور تجارت میں تعاون بڑھانے کا خواہاں ہے۔
صدر مملکت نے پاکستان اور قطر کی دوستی مزید مضبوط بنانے کے عزم کا اظہار کرتے ہوئے توانائی، زراعت اور ٹیکنالوجی میں شراکت داری کو فروغ دینے پر زور دیا۔
