وزیر اعلی سندھ سید مراد علی شاہ نے سندھ پولیس میں وسیع تر اصلاحات اور ٹیکنالوجی کی اپ گریڈیشن کا اعلان کرتے ہوئے کہا ہے کہ پولیس سٹیشن ریکارڈ مینجمنٹ سسٹم کو فارنزک ڈی این اے کیمیکل و عدالتی نظام سے منسلک کردیا، ججز مقدمات کی پیشرفت آن لائن دیکھ سکتے ہیں۔
جمعرات کو وزیراعلی مراد علی شاہ نے پاکستان نیوی کے 55ویں پی این سٹاف کورس اور 23ویں کوریسپونڈنس سٹاف کورس کے افسران سے خطاب کرتے ہوئے کہا کہ سندھ پولیس اس وقت 1لاکھ 62ہزار اہلکاروں اور 31 اضلاع میں قائم 618 پولیس سٹیشنز پر مشتمل ہے، پولیس کا بجٹ تقریبا 190 ارب روپے ہے جبکہ فرض کی ادائیگی کے دوران 2,553 اہلکاروں نے قربانی دی ہے۔
انہوں نے سندھ پولیس میں وسیع تر اصلاحات اور ٹیکنالوجی کی اپ گریڈیشن کا اعلان کرتے ہوئے کہا کہ فورس کو ڈھانچے، آپریشنز اور فلاح و بہبود کے شعبوں میں جدید خطوط پر استوار کیا جا رہا ہے۔
انہوں نے کہا کہ اصلاحات، پولیس سٹیشنز کی تزئین و آرائش اپ گریڈیشن اور مالی خودمختاری سے پولیسنگ ، امن وامان صورتحال میں بہتری آئی ہے، ایس ایچ اوز اور تفتیشی افسران کو ڈی ڈی اوز کے اختیارات دے دیئے گئے۔
انہوں نے بتایا کہ پولیس سٹیشن ریکارڈ مینجمنٹ سسٹم کو فارنزک ڈی این اے کیمیکل اور عدالتی نظام سے منسلک کیا گیا ہے ججز اب مقدمات کی پیش رفت آن لائن دیکھ سکتے ہیں۔
انہوں نے بتایا کہ سندھ سمارٹ سرویلنس سسٹم نے سینکڑوں ملزمان کی گرفتاری میں مدد دی ہے ۔
