لاہور: وزیراعلی پنجاب مریم نواز کی ہدایت پر قیدیوں کو عدالت پیشی پر روانگی سے قبل کھانے ،ٹھنڈے پانی کی فراہمی شروع کردی گئی۔ تفصیلات کے مطابق وزیر اعلی پنجاب مریم نواز کی ہدایت پر جیل ریفارمز ایجنڈے پر عملدرآمد کرتے ہوئے تمام قیدیوں کو عدالت روانگی سے قبل لنچ باکسز اور ٹھنڈے پانی کی بوتلوں کی فراہمی شروع کردی گئی۔
حکام کے مطابق پنجاب کی 43جیلوں میں روزانہ اوسطا 7 ہزار قیدیوں کو عدالت جاتے ہوئے کھانا اور ٹھنڈا پانی دیا جا رہا ہے۔
حکام کے مطابق پنجاب بھر کی جیلوں میں معیاری آٹے کی فراہمی کیلئے آٹا چکیوں کی تنصیب کی منظوری بھی دے دی گئی ہے جبکہ ٹریکٹر و دیگر زرعی آلات بھی فراہم کر دیئے گئے، زرعی آلات کی مدد سے جیلوں کی زمین کو قابل کاشت بنایا جائے گا۔ حکام کے مطابق قیدیوں کے کھانے کیلئے جیل میں ہی تازہ سبزیاں اور گندم اگائی جا رہی ہے۔
