کراچی: ایف آئی اے نے کراچی ایئرپورٹ پر کارروائی کرتے ہوئے جعلی دستاویزات پر کینیڈا جانے کی کوشش کرنیوالے مسافر کو گرفتار کرلیا۔ تفصیلات کے مطابق ایف آئی اے امیگریشن عملے نے پرتگال کے جعلی رہائشی کارڈ کی بنیاد پر کراچی ایئر پورٹ سے کینیڈا جانے کی کوشش کرنیوالے مسافر کو گرفتار کر لیا۔
ترجمان کے مطابق ملزم عرفان بشیر جعلی دستاویزات پر کراچی سے پی آئی اے کی ٹورنٹو کی پرواز ’پی کے 783‘ سے سفر کر رہا تھا،ملزم کی جانب سے امیگریشن کاؤنٹر پر پیش کیا جانیوالاپرتگال کا ریزیڈنٹ کارڈ جعلی نکلا جبکہ ملزم کے پاسپورٹ پر بیرون ملک آمد کی جعلی مہریں بھی لگی ہوئی تھیں۔
ترجمان کے مطابق ابتدائی تفتیش میں ملزم نے بتایا ہے کہ اس نے ٹریول ایجنٹ سے 90 لاکھ روپے کے عوض مذکورہ کارڈ اور دیگر جعلی دستاویزات حاصل کیں۔ترجمان نے بتایا کہ ملزم کو مزید کارروائی کیلئے کے اے ایچ ٹی سی کراچی منتقل کر دیا ہے۔
