پاکستان کا پہلا ہائپر سپیکٹرل سیٹیلائٹ ایچ ایس ون اتوار کو خلاء میں روانہ ہوگا، سپارکو نے تیاریاں مکمل کرلیں۔
ترجمان سپارکو کے مطابق سیٹیلائٹ کوپاکستانی سائنسدانوں اور انجینئرز کی موجودگی میں چین سے خلاء میں روانہ کیا جائے گا۔
حکام کے مطابق ہائپرسپیکٹرل سیٹیلائٹ سیلابوں، لینڈ سلائیڈز اور دیگر قدرتی آفات کی پیشگوئی میں مدد دے گا،ماحولیاتی تبدیلیوں اور ارضیاتی خطرات کی بروقت نگرانی میں معاون ثابت ہوگا۔
حکام کے مطابق سیٹیلائٹ انفراسٹرکچر میپنگ اور شہری منصوبہ بندی کیلئے بھی نئی راہیں کھولے گا۔ترجمان سپارکو کے مطابق پاکستان کا خلائی پروگرام جدید ٹیکنالوجی اور ایپلی کیشنز کے نئے دور میں داخل ہو رہا ہے، پاکستان کا یہ مشن قومی خلائی پالیسی اور وژن 2047ء کا اہم سنگ میل ہے۔
واضح رہے کہ یہ سال 2025ء میں خلا میں بھیجا جانیوالا پاکستان کا تیسرا سیٹلائٹ ہوگا۔ اس سے قبل ای او ون جنوری 2025 اور کے ایس ون جولائی 2025 میں کامیابی سے خلاء میں بھیجے جاچکے ہیں جو اس وقت مکمل فعال ہیں۔
