اسلام آباد : وفاقی وزیرخزانہ محمد اورنگزیب نے کہا ہے کہ ایف بی آر کی کوششوں کا مقصدٹیکس بنیاد کو وسیع کرنا ،خوردہ فروشوں کو ٹیکس نیٹ میں لانا ہے،سازگار نتائج کیلئے عوام ، تاجر برادری کی مشاورت سے فیصلے کرینگے، بجٹ کو حتمی شکل دیتے وقت تاجروں کی تجاویز پر غور کیا جائے گا۔
تفصیلات کے مطابق پاکستان وفاقی وزیر خزانہ محمد اورنگزیب سے پیر کو بزنس کونسل کے وفد نے ملاقات کی جس میں نئے مالی سال کے بجٹ پر تبادلہ خیال کیا اور حکومت کی جاری کوششوں کو سراہتے ہوئے مخصوص ٹیکس تجاویز پیش کی گئیں۔
وزیر خزانہ نے وفد کو یقین دلایا کہ ان کی سفارشات کو نوٹ کیا جا رہا ہے اور جس حد تک ممکن ہوا بجٹ کو حتمی شکل دینے میں ان پر غور کیا جائے گا۔ وزیرخزانہ نے وفد کو ایف بی آر کی جاری کوششوں کے بارے آگاہ کرتے ہوئے کہا کہ ان کوششوں کا مقصد ٹیکس کی بنیاد کو وسیع کرنا اور خوردہ فروشوں کو ٹیکس نیٹ میں لانا ہے۔ انہوں نے کہا کہ عوام اور تاجر برادری دونوں کیلئے سازگار نتائج کو یقینی بنانے کیلئے باہمی مشاورت سے فیصلے کئے جائیں گے۔
