پاکستان اور متحدہ عرب امارات نے دوطرفہ تجارت و اقتصادی تعاون کو مزید فروغ دینے کے عزم کا اعادہ کیا ہے۔
جاری بیان کے مطابق وزیراعظم کے معاون خصوصی برائے تجارت رانا احسان افضل خان نے دبئی میں یو اے ای کے وزیر برائے غیر ملکی تجارت ڈاکٹر ثانی بن احمد الزیودی سے ملاقات کی ،اس موقع پر دبئی میں قائم پاکستانی قونصل خانے کے ٹریڈ اینڈ انویسٹمنٹ کونسلر بھی موجود تھے۔
ملاقات میں دونوں ممالک کے درمیان تجارتی و اقتصادی تعلقات پر تفصیلی تبادلہ خیال کیا گیا۔ دونوں رہنمائوں نے دوطرفہ تجارت، اقتصادی تعاون کو مزید فروغ دینے جبکہ نئے شعبوں میں تعاون بڑھانے پر اتفاق کیا۔
رانا احسان افضل خان نے یو اے ای کی کاروباری برادری کو پاکستان میں سرمایہ کاری کے نئے مواقع تلاش کرنے کی دعوت دی۔
رانا احسان افضل نے یو اے ای کی کمپنیوں کو وزارتِ تجارت پاکستان کے زیراہتمام 25تا 27نومبر 2025ء تک منعقد ہونیوالی فوڈ ایگ 2025ء نمائش میں شرکت کی خصوصی دعوت بھی دی۔
