وزیر دفاع خواجہ آصف نے آزاد کشمیر میںجاری احتجاج کی شدید مذمت کرتے ہوئے کہاہے کہ کشمیر کی آزادی کیلئے پاکستان نے خود کو دائو پر لگا دیا،احتجاج کرنیوالے مقبوضہ کشمیر کی 3نسلوں کی جدوجہد پر غور کریں۔
جاری بیان میں خواجہ آصف نے کہا کہ آزاد کشمیر کے شہریوںکو جو میسر ہے مقبوضہ کشمیر کے شہری اس کے عشر عشیر کا بھی تصور نہیں کر سکتے، وہ کشمیر کی آزادی کی تاریخ اپنے خون سے لکھ رہے ہیں،آزاد کشمیر میں احتجاج کرنیوالے مقبوضہ کشمیر کی 3نسلوں کی جدوجہد پر غور کریں۔
انہوں نے کہا کہ اس جدوجہد میں ایک نسل جیلوں میں جوانی سے بڑھاپے میں پہنچ گئی، پھانسی چڑھ گئے سینے پہ گولیاں کھائیں وہ پاکستان سے محبت کی ہر روز قیمت ادا کرتے ہیں۔وفاقی وزیر نے کہا کہ اکتوبر 1947 میں سرحدپار کرتے وقت ایک لاکھ کشمیری مسلمان شہید ہوئے۔
انہوں نے کہا کہ پاکستان نے اپنا وجود کشمیر کی آزادی کیلئے دائو پہ لگایا دیا اور لگائے گا بھی ،کشمیر کی جنگوں میں شہید فوجیوں میں پنجابی، پختون، بلوچ اور سندھی سمیت سب شامل ہیں۔
