شام کے صدر احمد الشرع نے کہا ہے کہ اسرائیل نے دمشق میں عبوری دور کا فائدہ اٹھایا،اس نے خطے کو نئے تنازعات کے خطرے میں ڈال دیا ، شام جنگ نہیں چاہتا،موجودہ بحران کو حل کرنے کے لیے بات چیت اور سفارت کاری کا استعمال کر رہا ہے۔
اقوام متحدہ کی جنرل اسمبلی سے خطاب کرتے ہوئے احمد الشرع نے کہا کہ شام گولان کی پہاڑیوں میں اسرائیلی اور شامی افواج کے درمیان علیحدگی سے متعلق 1974 کے معاہدے پر عمل پیرا ہے اور اسرائیل کے ساتھ اختلافات کو حل کرنے کے لیے سفارتی ذرائع کا سہارا لے رہا ہے، 8 دسمبر 2024 سے جب سابق حکومت کا تختہ الٹا گیا شام کے خلاف اسرائیلی دھمکیاں کم نہیں ہوئیں، شام پر اسرائیل کے حملے نئے بحرانوں کو جنم دینے کے خطرے کا باعث بن رہے ہیں۔
انہوں نے کہا کہ شام میں خونریزی کے ذمہ دار تمام لوگوں کا محاسبہ کیا جائے گا، شامی ریاست نے حقائق تلاش کرنے والی کمیٹیوں کی تشکیل پر کام کیا ہے اور اقوام متحدہ کو بھی تفتیش کی اجازت دی ہے، میں بے گناہوں کے خون سے داغدار ہر شخص کو انصاف کے کٹہرے میں لانے کا عہد کرتا ہوں۔
