سیکیورٹی فورسز کے آپریشنز میں 35 بھارتی حمایت یافتہ خوارج ہلاک، 12 جوان شہید
خیبرپختونخوا میں سیکیورٹی فورسز نے مختلف کارروائیوں کے دوران مجموعی طور پر 35 بھارتی حمایت یافتہ فتنۃ الخوارج کو ہلاک کر دیا، اس دوران پاک فوج کے 12 جوان بھی جامِ شہادت نوش کر گئے۔
پاک فوج کے شعبہ تعلقات عامہ (آئی ایس پی آر) کے مطابق باجوڑ میں خفیہ اطلاعات پر انٹیلی جنس بیسڈ آپریشن کیا گیا، جس کے دوران فائرنگ کے شدید تبادلے میں 22 بھارتی سرپرستی کے حامل خوارج مارے گئے۔ جنوبی وزیرستان میں ایک اور کارروائی میں 13 دہشت گردوں کو ہلاک کیا گیا۔
آئی ایس پی آر کا کہنا ہے کہ فائرنگ کے تبادلے میں پاک فوج کے 12 بہادر جوانوں نے مادرِ وطن پر جان نچھاور کر کے جام شہادت نوش کیا۔ فورسز نے ہلاک دہشت گردوں کے قبضے سے بھاری مقدار میں اسلحہ اور گولہ بارود بھی برآمد کیا۔
اس سے قبل مہمند کے علاقے گلونو میں خفیہ اطلاع پر کیے گئے آپریشن میں 14 بھارتی حمایت یافتہ خوارج مارے گئے تھے، جبکہ شمالی وزیرستان کے دتہ خیل میں 4 اور بنوں میں ایک خارجی کو جہنم واصل کیا گیا۔
آئی ایس پی آر کے مطابق مارے جانے والے تمام خوارج بھارتی سرپرستی میں علاقے میں دہشت گردی کی متعدد کارروائیوں میں ملوث تھے۔
