لاہور: وزیر اطلاعات پنجاب عظمی بخاری نے پنجاب کے قرض بارے خبریں بے بنیاد و گمراہ کن قرار دیتے ہوئے کہاہے کہ پنجاب کو کسی قرض کی ضرورت نہیں،اکائونٹس میں 1 ٹریلین روپے سے زائد موجود ہیں، مالیاتی معاملات کی بنیادی سمجھ بوجھ نہ رکھنے والے افراد ایسی اطلاعات پھیلا رہے ہیں۔
جاری بیان میں عظمی بخاری نے کہا کہ پنجاب حکومت نے سٹیٹ بینک سے ایک روپیہ بھی قرض نہیں لیا، رپورٹ میں جس رقم کا ذکر ہے وہ دراصل پنجاب حکومت کی فیڈرل گورنمنٹ کے ٹی بلز میں سرمایہ کاری ہے جس کا مقصد منافع حاصل کرنا ہے، قرض لینا نہیں۔
انہوں نے کہا کہ پنجاب اس وقت ایک سرپلس صوبہ ہے اور صوبائی حکومت کے اکائونٹس میں 1ٹریلین روپے سے زائد رقم موجود ہے، اس لئے پنجاب کو کسی سے قرض لینے کی ضرورت ہی پیش نہیں آتی۔ انہوں نے کہا کہ رپورٹ میں جن اداروں کا ذکر ہے وہ ممکنہ طور پر وفاقی حکومت کے ہیں، پنجاب کے زیر انتظام کسی ادارے نے کوئی قرض نہیں لیا، حیرت کی بات یہ ہے کہ خبر لکھنے والے کو یہ بنیادی بات بھی معلوم نہیں تھی کہ 2019ء کے بعد سٹیٹ بینک ایکٹ کے تحت کسی بھی حکومت، چاہے وفاقی ہو یا صوبائی کو براہ راست سٹیٹ بینک سے قرض لینے کی اجازت نہیں۔
انہوں نے کہا کہ مالیاتی معاملات کی بنیادی سمجھ بوجھ نہ رکھنے والے افراد ایسی اطلاعات پھیلا رہے ہیں۔ انہوں نے کہا کہ جھوٹی و بے سروپا خبریں پھیلانے والے صحافی کو اپنی خبر پر شرمندگی کا اظہار کرے ،بصورت دیگر حکومت کو قانونی چارہ جوئی کا حق حاصل ہے۔
