مظفر آباد: آزاد کشمیر میں مون سون بارشوں سے مختلف حادثات میں 23 افراد جاں بحق،28 زخمی ،167 گھر مکمل تباہ ہوگئے۔
ایس ڈی ایم اے کی رپورٹ کے مطابق آزاد کشمیر میں یکم جون سے اب تک جاری مون سون بارشوں کے نتیجے میں مختلف حادثات کے باعث 23افراد جاں بحق اور 28زخمی ہو ئے ہیں، بارشوں سے 167گھر مکمل تباہ ہوئے جبکہ 635گھروں کو جزوی نقصان پہنچا۔
رپورٹ کے مطابق 49دکانیں ،4سکول تباہ جبکہ 212مویشی ہلاک ہوئے ہیں۔رپورٹ کے مطابق11پن چکیاں دریا برد ہو چکیں، وادی نیلم اور جہلم ویلی سمیت متعدد علاقوں میں 25رابطہ پل ندی نالوں میں بہہ گئے، سیلابی ریلوں سے مجموعی 50.5کلو میٹر سڑکیں تباہ ہوئی ہیں۔
رپورٹ کے مطابق ،40نہروں، 59واٹر سپلائی سکیموں اور 14گاڑیوں کو بارشوں سے نقصان پہنچا جبکہ وادی نیلم میں 10پل، 2ہائیڈل پاور، 40نہری منصوبے تباہ ہوئے ہیں۔
