لاہور: آئی جی پنجاب ڈاکٹر عثمان انور نے پولیس شہداء کو خراج عقیدت پیش کرتے ہوئے کہا ہے کہ زندہ قومیں کبھی اپنے ہیروز کو فراموش نہیں کرتیں،ملک کی خاطر جانیں دینے والے پولیس کے عظیم ثبوت ہمارے ہیرو ہیں۔
یوم شہداء پولیس پر جاری بیان میں آئی جی عثمان انور نے کہا کہ پنجاب پولیس کے 1700سے زائد بہادر افسران و جوانوں نے دہشت گردی کے خاتمے، امن و امان کے قیام اور جرائم کے خلاف جنگ میں اپنی قیمتی جانوں کا نذرانہ پیش کیا۔
انہوں نے کہا کہ یومِ شہدا پولیس، شہدا کے ساتھ تجدیدِ عہد کا دن ہے، زندہ قومیں کبھی اپنے ہیروز کو فراموش نہیں کرتیں،وطن عزیز کی خاطر اپنی جانوں کا نذرانہ پیش کرنے والے پنجاب پولیس کے عظیم سپوت ہمارے ہیرو ہیں، جنہیں پوری قوم سلام پیش کرتی ہے۔
انہوں نے کہا کہ اپنے لخت جگر وطن پر قربان کرنے والی ماں کو بھی میرا سلام ہے، جنہوں نے اس قوم کو ایسے عظیم بیٹے دیئے۔ انہوں نے عزم ظاہر کیا کہ شہدا کے اہلخانہ کی بہترین فلاح و بہبود اور دیکھ بھال ان کی اولین ترجیح ہے۔
