کراچی: چیئرمین پیپلز پارٹی بلاول بھٹو نے کہا ہے کہ قوم کو مہنگائی، بیروزگاری،غربت کی دلدل سے نکالنے،ملکی ترقی کیلئے پرعزم ہیں، ملک میں جمہوریت، آئین اور مساوات کے بنیادی اصولوں کی پاسداری یقینی بنانے کا عہد کرنا ہوگا۔
77 ویں یوم آزادی کے موقع پر جاری پیغام میں چیئرمین پیپلز پارٹی بلاول بھٹو نے قوم کو مبارکباد دیتے ہوئے کہا ہے کہ یوم آزادی پرہم اپنے آباؤ اجداد کی قربانیوں کو خراج عقیدت اور ان بزرگوں کو سلام پیش کرتے ہیں جنہوں نے آزادی و خودمختاری کیلئے جدوجہد کی۔
انہوں نے کہا آج کا دن قائد اعظم محمد علیؒ جناح کے وژن اور جمہوری نظریات کی عکاسی کرنے کا دن ہے،آج کا دن چیلنجزکا سامنا کرنے اور اپنے ماضی سے سیکھنے کا بھی دن ہے۔انہوں نے کہا کہ 1973ء کا آئین تحریک آزادی کے جذبے کا مظہر، ملکی مستقبل کیلئے متفقہ لائحہ عمل ہے۔
بلاول نے کہا کہ آمرانہ ادوار حکمرانی نے بنیادی آزادیوں اور حقوق کو کمزور کیا، ہمارا ملک ایک مثالی آئین و جمہوریت پسند لیڈر نے قائم کیا تھا، دیکھنے کی ضرورت ہے اس کے باوجود کیوں ہمارے ملک کو آمرانہ حکمرانی کے ادوار کا سامنا کرنا پڑا۔
انہوں نے کہا کہ پیپلز پارٹی قوم کے بانی اجداد کے وژن کے مطابق جمہوریت کو مضبوط بناکر ملکی ترقی و اتحاد کو آگے بڑھانے کیلئے پرعزم ہے۔ انہوں نے کہا کہ صدرزرداری کا مفاہمت،قومی اتحاد کا وژن چیلنجز سے نمٹنے کیلئے باعث امید و طاقت ہے، پیپلز پارٹی دہشت گردی کے خلاف جنگ جاری رکھے گی، ہم قوم کو مہنگائی، بیروزگاری اور غربت کی دلدل سے نکالنے کے لئے پرعزم ہے۔انہوں نے کہا کہ ہمیں عہد کرنا ہوگا کہ ملک میں جمہوریت، آئین اور مساوات کے بنیادی اصولوں کی پاسداری یقینی بنائیں گے۔
