اسلام آباد: عدالت نے پیکا ایکٹ کے تحت درج مقدمے میں پی ٹی آئی میڈیا کوارڈنیٹر احمد وقاص جنجوعہ کو جوڈیشل ریمانڈ پر جیل بھیج دیا ۔تفصیلات کے مطابق ڈسٹرکٹ اینڈ سیشن عدالت اسلام آباد میں ڈیوٹی مجسٹریٹ عباس شاہ نے پی ٹی آئی انٹرنیشنل میڈیا کوارڈنیٹر احمد وقاص جنجوعہ کیخلاف پیکا ایکٹ کے تحت درج مقدمے کی سماعت کی ۔ ایف آئی اے پراسیکیوٹر عامر شیخ اور تفتیشی افسر نجف عدالت کے سامنے پیش ہوئے جبکہ احمد وقاص کو 2روزہ جسمانی ریمانڈ مکمل ہونے پر عدالت کے روبرو پیش کیا گیا، ایف آئی اے پراسیکیوٹر نے کہا کہ اب تک پیشرفت نہیں ہوسکی ملزم نے تعاون نہیں کیا، 8 روزہ مزید جسمانی ریمانڈ درکار ہے۔
ایمان مزاری ایڈووکیٹ نے کہا کہ احمد وقاص جنجوعہ کی بازیابی کی درخواست اسلام آباد ہائیکورٹ میں دائر کی تاہم انہیں دو دن تک کسی عدالت میں پیش نہیں کیا گیا۔ہادی علی چٹھہ ایڈووکیٹ نے احمد وقاص کے جسمانی ریمانڈ کی مخالفت کرتے ہوئے کہاکہ ایف آئی آر میں سیکشن 9، 10اور 11لگائی گئی مگر وہ احمد وقاص پر لاگو ہوتے ہی نہیں، اس کیس میں مرکزی ملزم جوڈیشل ہوچکا ہے جبکہ احمد وقاص کا کسی سے رابطہ ثابت نہیں ہوا، سی ٹی ڈی کے کیس میں جوڈیشل ہونے کے بعد ایف آئی اے کے کیس میں گرفتاری ڈال دی گئی، ابھی تک دونوں کیسز میں احمد وقاص کے خلاف کوئی شواہد نہیں ملے۔بعد ازاں عدالت نے احمد وقاص جنجوعہ کو جوڈیشل ریمانڈ پر جیل بھیج دیا۔
