ڈھاکا: ایشین کرکٹ کونسل (اے سی سی) کے صدر محسن نقوی کی زیر صدارت اے سی سی کی سالانہ جنرل میٹنگ (کل) جمعرات کو ڈھاکا میں ہوگی، محسن نقوی اے سی سی کی سالانہ جنرل میٹنگ کی صدارت کریں گے۔
بنگلادیش کرکٹ بورڈ کے صدر آمین الاسلام نے ایئر پورٹ پر صدر اے سی سی محسن نقوی کا استقبال کیا۔ واضح رہے کہ اے سی سی کی سالانہ جنرل میٹنگ کے دوران ایشیا کپ کے شیڈول اور میزبان ملک کا فیصلہ ہوگا، بھارت کے پاس ٹورنامنٹ کی میزبانی ہے، اس نے ابھی تک اجلاس میں شرکت کی تصدیق نہیں کی اور نہ ہی ویڈیو لنک پر شرکت کے حوالے سے اے سی سی کو آگاہ کیا ہے۔
بھارتی میڈیا کے مطابق بھارتی بورڈ کا بنگلادیش میں سیاسی صورتحال کے باعث وہاں جانا مناسب نہیں، بھارتی بورڈ اگست میں بنگلادیش میں سیریز بھی ملتوی کر چکا ہے۔ بھارتی بورڈ نے اے سی سی کو وینیو تبدیل کرنے سے متعلق باضابطہ طور پر بتا دیا، میٹنگ دوسرے وینیو منتقل نہ کی تو بھارتی بورڈ میٹنگ سے دستبردار ہو سکتا ہے۔
