بنکاک: پاکستان نے تھائی لینڈ میں جاری ایشین انڈر 16 والی بال چیمپئن شپ میں ایران کو 3-1 سے شکست دے کر مسلسل پانچویں کامیابی حاصل کر لی۔ ایشین انڈر 16 والی بال چیمپئن شپ میں پاکستان کی فتوحات کا سلسلہ جاری ہے۔
جمعرات کو آج ہونے والے کراس اوور راونڈ میں گروپ ایف کے میچ میں پاکستان اور ایران کے درمیان میچ دو گھنٹے سے زائد وقت تک جاری رہا، ایران کے خلاف پاکستان کی جیت کا اسکور 25-23، 25-19،25-22 اور 31-29 رہا۔ پاکستان کی جانب سے فیضان اللہ، محمد عرفان ، محمد جنید اور ساران بیگ نے نمایاں کھیل پیش کیا۔
فیضان اللہ نے 21 اٹیک پوائنٹس سمیت 23 پوائنٹس حاصل کیے جبکہ عرفان نے 16 پوائنٹس بنائے۔ میچ میں مجموعی طور پر پاکستان نے ایران پر اٹیک پوائنٹس میں 51-44 اور بلاک پوائنٹس میں 15-11 سے سبقت رکھی جبکہ سروس پوائنٹس میں ایران بہتر رہا۔ پاکستان پہلے ہی ایونٹ کے ٹاپ فور میں اپنی جگہ پکی کر چکا ہے جہاں اس کا مقابلہ بھارت یا جاپان سے ہو گا۔
