لاہور: پاکستان ہاکی فیڈریشن کے سیکرٹری جنرل رانا مجاہد نے کہا ہے کہ ایشیا کپ کے حوالے سے ہماری حکومت جو بھی فیصلہ کرے گی ہم اس پر عمل کریں گے، ٹیم کو ایشیا کپ کے لیے بھارت بھجوانے کا حتمی فیصلہ وزیر اعظم پاکستان کریں گے۔
لاہور میں پریس کانفرنس کے دوران رانا مجاہد نے کہا کہ نیشنز کپ اور انڈر 18 ایشیا کپ کے علاوہ کھلاڑیوں کو باقی ٹورنامنٹس کے ڈیلی الانس مل گئے ہیں، ہم نے ایک ارب یا 70 کروڑ روپے کی رقم کا کوئی مطالبہ نہیں کیا، سیکرٹری آئی پی سی اور ڈی جی پی ایس بی سے میٹنگ میں طے پایا ہے کہ ہم نے اخراجات کی تفصیل بنا کر دینی ہے، ہاکی کے لیے کم ازکم سالانہ 75 کروڑ روپے کا بجٹ درکار ہے۔
انہوں نے کہا کہ قومی کھیل پر توجہ دینے پر فیلڈ مارشل سید عاصم منیر کے شکر گذار ہیں، انڈر 18 ایشیا کپ، جونیئر ایشیا کپ اور نیشنز کپ میں پاکستان کی ٹیموں نے فائنل کھیلے ہیں، ہماری ٹیموں کی اچھی کارکردگی پر ٹیموں کی تعریف کی بجائے تنقید کی جارہی ہے، ہم نے 18 ویں رینکنگ سے شروع کیا اور ہم 12 نمبر پر آگئے ہیں، اس وقت پاکستان ہاکی فیڈریشن ایشیا کپ کے حوالے سے نازک صورت حال میں ہے۔
سیکرٹری پی ایچ ایف نے مزید کہا ہے کہ انٹرنیشنل ہاکی فیڈریشن نے پرو لیگ کے لیے 21 جولائی تک نیوزی لینڈ سے جواب مانگ رکھا ہے، نیوزی لینڈ کے انکار کی صورت میں پاکستان کو موقع ملے گا، ہم سے ایف آئی ایچ نے اپنی دستیابی مانگ رکھی ہے۔
