پشاور: وزیر اعلی خیبرپختونخوا علی امین گنڈاپور نے کاغذات نامزدگی کی بنیاد پر مخصوص نشستوں کے لئے عدالت میں درخواست دائر کرنے کا اعلان کرتے ہوئے کہا ہے کہ تحریک عدم اعتماد لانے کا شوق رکھنے والے حقیقت دیکھ لیں گے،اس وقت اسمبلی میں ہمارے تمام ارکان آزاد ہیں۔
جاری بیان میں علی امین نے کہا کہ میں آزاد نہیں پی ٹی آئی کا رکن ہوں، میں نے اپنے کاغذات نامزدگی میں خود کو آزاد نہیں لکھا، پی ٹی آئی کا نام لکھا تھا۔ انہوں نے کہا کہ سینیٹ کے 21جولائی کے انتخابات سے متعلق مشاورت کی جائیگی، حکومت مضبوط ہے، کوئی رکن کہیں نہیں جا رہا، تحریک عدم اعتماد لانے کا شوق رکھنے والے حقیقت دیکھ لیں گے۔
انہوں نے کہا کہ اس وقت اسمبلی میں ہمارے تمام ارکان آزاد ہیں، پی ٹی آئی کا کوئی رکن نہیں، آئینی بینچ کے فیصلے کے بعد سپریم کورٹ کا پہلا فیصلہ ختم ہو گیا۔
انہوں نے کہا کہ بجٹ نہ پیش کرنے کا پروپیگنڈا اپنوں کا تھا، پارٹی پیٹرن انچیف نے بجٹ منظوری پر اطمینان کا اظہار کیا، 2ارکان نے بجٹ کے حق میں ووٹ نہیں دیا، سب جانتے ہیں وہ کس کے لوگ ہیں۔
انہوں نے کہا کہ دریائے سوات واقعہ کی ڈسکہ کی متاثرہ فیملی کے لواحقین سرکاری نوکری کا تقاضا کر رہے ہیں، پنجاب ڈومیسائل کی بنیاد پر خیبرپختونخوا میں سرکاری نوکری نہیں مل سکتی۔
انہوں نے کہا کہ لواحقین کو 20لاکھ روپے فی کس کے حساب سے 2 کروڑ روپے معاوضہ دیا جائے گا، 2کروڑ روپے کو کیسے کاروبار کیلئے استعمال کرنا ہے، اس کا بھی مشورہ دیا ہے۔
