چین کے مشرقی شہر شنگھائی میں گاڑیوں کی صنعت کی 21 ویں عالمی نمائش میں بی وائے ڈی کی یانگ وانگ یو8ایل گاڑی کی نمائش کی جارہی ہے-(شِنہوا)
بیجنگ(شِنہوا)اپریل میں چین کی صنعتی پیداوار میں مستحکم نمو دیکھنے میں آئی کیونکہ بیرونی رکاوٹوں کے باوجود ملک کی معاشی کارکردگی مستحکم رہی۔
چین کے قومی ادارہ برائے شماریات (این بی ایس) نے کہا ہے کہ اپریل میں چین کی تیار شدہ اشیاء کی صنعتی پیداوار میں گزشتہ سال کے مقابلے میں 6.1 فیصد اضافہ ہوا ہے۔
سرکاری اعداد و شمار کے مطابق پیداواری شعبے کی تیارشدہ اشیاء کی پیداوار میں گزشتہ ماہ کے مقابلے میں 6.6 فیصد اضافہ دیکھا گیا، سازوسامان کی پیداوار اور ہائی ٹیک پیداوار میں بالترتیب 9.8 فیصد اور 10 فیصد اضافہ ہوا۔
اعداد و شمار کے مطابق رواں سال کے پہلے 4 ماہ میں ملک کی صنعتی پیداوار میں گزشتہ سال کے مقابلے میں 6.4 فیصد اضافہ ہوا۔
صنعتی پیداوار کا استعمال بڑے کاروباری اداروں کی سرگرمی جانچنے کے لئے کیا جاتا ہے جن میں سے ہر ایک کا سالانہ اہم کاروبار کم از کم 2کروڑ یوآن (تقریباً 27لاکھ 80ہزار امریکی ڈالر) ہوتا ہے۔
این بی ایس کے ترجمان فو لنگ ہوئی نے ایک پریس کانفرنس میں کہا کہ موثر پالیسی حمایت کے ساتھ صنعتی شعبے نے اس سال نسبتاً تیزی سے توسیع کو برقرار رکھا ہے، جس نے اعلیٰ درجے کی ذہین اور ماحول دوست تبدیلی میں ٹھوس پیشرفت کی ہے۔
مثبت رجحان کے باوجود فو لنگ ہوئی نے متنبہ کیا کہ بعض کاروباری اداروں کو اب بھی کاروباری سرگرمیوں میں مشکلات کا سامنا ہے۔ انہوں نے ملکی طلب کو بڑھانے اور جدیدیت پر مبنی ترقی کو فروغ دینے کے لئے معاون پالیسیوں کو نافذ کرنے کے لئے مزید کوششوں کا مطالبہ کیا۔
