لاہور : پی ڈی ایم اے نے پنجاب کے بیشتر اضلاع میں طوفانی بارشوں کی پیشگوئی کرتے ہوئے انتظامیہ کو الرٹ رہنے کی ہدایت کردی۔ تفصیلات کے مطابق پی ڈی ایم اے پنجاب نے صوبے کے بیشتر اضلاع میں موسلا دھار بارشوں کی پیشگوئی کرتے ہوئے انتظامیہ کو کسی بھی ہنگامی صورتحال سے نمٹنے کیلئے الرٹ رہنے کی ہدایت کی ہے۔
ترجمان پی ڈی ایم اے کے مطابق لاہور، سیالکوٹ، نارووال، گوجرانوالہ، فیصل آباد اور راولپنڈی سمیت دیگر شہروں میں تیز ہواؤ ں اور گرج چمک کیساتھ بارشیں متوقع ہیں، مون سون بارشوں کا رواںسپیل 20جولائی تک جاری رہنے کا امکان ہے۔
پی ڈی ایم اے کے مطابق دریائے سندھ، چناب، راوی، جہلم اور ستلج میں فی الحال پانی کا بہاؤ نارمل لیول پر ہے، منگلا ڈیم 55فیصد اور تربیلا ڈیم میں پانی کی سطح 72فیصد تک ہے جبکہ پاکستانی دریاؤں پر قائم بھارتی ڈیمز میں پانی کی سطح 38فیصد تک ہے۔
ڈی جی پی ڈی ایم اے عرفان علی کاٹھیا نے متعلقہ اداروں کو الرٹ رہنے کی ہدایات کرتے ہوئے کہا کہ بڑے شہروں کی انتظامیہ پیشگی انتظامات مکمل کرے، شہری دریاؤں ،ندی نالوں کی غیر ضروری کراسنگ سے گریز کریں اور بجلی کی تاروں اور کھمبوں سے فاصلہ رکھیں۔
