وزیراعظم شہباز شریف نے آئی ٹی برآمدات بڑھانے کیلئے واضح اہداف وضع کرنے کی ہدایت کرتے ہوئے کہا ہے کہ پاکستان کے پاس باصلاحیت افرادی قوت اور وسائل کی کمی نہیں، بہتر استعمال سے آئی ٹی برآمدات 25ارب ڈالر سے بھی تجاوز کر سکتی ہیں،آئی ٹی شعبے میں اصلاحات کے نفاذ،مختلف اداروں کیساتھ تعاون کو فروغ دینے ۔کیلئے کمیٹی قائم کی جائے
وزیراعظم شہباز شریف کی زیر صدارت آئی ٹی شعبے میں اصلاحات پر جائزہ اجلاس کا انعقاد ہواجس میں وفاقی وزیر اقتصادی امور احد خان چیمہ، وزیر مملکت انفارمیشن ٹیکنالوجی شزہ فاطمہ خواجہ و متعلقہ اعلی حکام نے شرکت کی۔اجلاس کو آئی ٹی شعبے کی برآمدات 25ارب ڈالر تک پہنچانے کیلئے ہر شعبے کی استعداد سے آگاہ کرتے ہوئے بتایا گیا کہ وزیر اعظم کے آئی ٹی شعبے کو ترجیح بنانے کے ویژن کے نتیجے میں گزشتہ 4ماہ میں آئی ٹی شعبے کی برآمدات میں 34فیصد اضافہ ہوا ہے،
ای گورننس بارے پاکستان عالمی رینکنگ میں 14درجے بہتر ہوا،پاکستان کی آئی ٹی رینکنگ 79سے بہتر ہو کر 40ہوگئی جبکہ 2500نئی آئی ٹی کمپنیاں رجسٹر ہوئیں ہیں۔ اجلاس کو بتایا گیا کہ آئندہ 5سال میں آئی ٹی شعبے کی برآمدات سے 15ارب ڈالر، ٹیلی کام برآمدات سے 1ارب ڈالر جبکہ ڈیجیٹائیزیشن سے 10ارب ڈالر کے حصول کا ہدف رکھا گیا ہے۔ اجلاس کو آئی ٹی شعبے کی برآمدات کی موجودہ صورتحال اور ٹیلی کام شعبے میں اصلاحات سے بھی آگاہ کیا گیا۔اجلاس کو مجوزہ لیبر مینجمنٹ سسٹم بارے بریفنگ دیتے ہوئے بتایا گیا کہ صنعتوں سے طلب کا ڈیٹا استعمال کرنے کے بعد تعلیمی اداروں کے تعاون سے افرادی قوت کی استعداد بڑھا کر روزگار کی فراہمی یقینی بنائی جائے گی۔
اجلاس کو آئی ٹی شعبے میں کام کرنیوالے نوجوانوں بالخصوص فری لانسرز کو ترسیلات زر میں سہولت کیلئے مجوزہ منصوبے کے حوالے سے بھی آگاہ کیا گیا۔وزیر اعظم نے بین الاقوامی پیمنٹ گیٹ ویز بارے اقدام کو احسن قرار دیتے ہوئے اس پر جلد عمل درآمد کی ہدایات کی۔وزیر اعظم نے آئی ٹی شعبے کی برآمدات میں اضافے کے لائحہ عمل پر اطمینان کا اظہار کرتے ہوئے وزیر مملکت انفارمیشن ٹیکنالوجی اور ٹیم کی کوششوں کو سراہا اور معینہ مدت میں اس پر عملدرآمد کی ہدایات جاری کیں۔
وزیراعظم نے کہا کہ آئی ٹی برآمدات میں اضافے کیلئے پیش کی گئیں اصلاحات کی راہ میں حائل چیلنجز سے نمٹنے کیلئے تمام ادارے مل کر تعاون کریں۔ وزیراعظم نے آئی ٹی شعبے میں اصلاحات کے نفاذ اور مختلف اداروں کیساتھ تعاون کو فروغ دینے کیلئے کمیٹی بنانے قائم کرنے کی ہدایت کرتے ہوئے کہا کہ آئی ٹی شعبے کی اصلاحات پر عملدرآمد کی نگرانی بذات خود کروں گا۔
انہوں نے کہا کہ آئی ٹی شعبے کی اصلاحات کا پیش کردہ لائحہ عمل بہترین ہے، اب اس پر عملدرآمد یقینی بنایا جائے۔وزیراعظم نے کہا کہ پاکستان کے پاس باصلاحیت افرادی قوت اور وسائل کی کمی نہیں، وسائل کے بہتر استعمال،افرادی قوت کی بہترین تعلیم و تربیت کے ذریعے پاکستان کی آئی ٹی برآمدات 25ارب ڈالر سے بھی تجاوز کر سکتی ہیں۔
وزیراعظم نے آئی ٹی برآمدات بڑھانے بارے واضح اہداف وضع کرنے اور ہر اقدام کیلئے معینہ مدت کے تعین کی ہدایت کی۔انہوں نے کہا کہ پاکستانی نوجوانوں کو عالمی معیار کی تعلیم و تربیت اور ہنر دینے کیلئے ہائر ایجوکیشن کمیشن لائحہ عمل تیار کرے، پاکستانی آئی ٹی ماہرین کی خلیجی ممالک میں طلب موجود ہے، اس حوالے سے بھی تجاویز کو جلد عملی جامہ پہنایا جائے۔
