چیف آف آرمی سٹاف جنرل سید عاصم منیر نے کہا ہے کہ دیرپا استحکام و سلامتی یقینی بنانے کیلئے مربوط و مضبوط آپریشنز کے ذریعے پاک فوج قانون نافذ کرنیوالے اداروں کیساتھ مل کر امن کے دشمنوں کا تعاقب جاری رکھے گی۔
آئی ایس پی آر کے مطابق چیف آف آرمی سٹاف جنرل سید عاصم منیر نے 19نومبر کو منعقدہ نیشنل ایپکس کمیٹی کے اجلاس کے تسلسل اور جلد منعقد ہونیوالے صوبائی ایپکس کمیٹی کے اجلاس کی تیاری کے طور پر جمعہ کو پشاورکا دورہ کیا۔
پشاور پہنچنے پر کور کمانڈر پشاور نے آرمی چیف کا استقبال کیا۔آرمی چیف کو موجودہ سیکیورٹی صورتحال اور علاقے میں جاری انسدادِ دہشت گردی آپریشنز کی پیش رفت پر تفصیلی بریفنگ دی گئی۔آرمی چیف نے شہدا اور غازیوں کو زبردست خراجِ عقیدت پیش کرتے ہوئے مادر وطن کے دفاع کیلئے دی گئی ان کی بے مثال قربانیوں کو سراہا۔
آرمی چیف نے فوجیوں کے بلند حوصلے، آپریشنل تیاری اور ہر قسم کے خطرات کا موثر انداز میں مقابلہ کرنے کے عزم کو سراہتے ہوئے دہشت گردی کے نیٹ ورکس،قومی سلامتی کو نقصان پہنچانے والے تمام غیر قانونی عوامل کے خاتمے کیلئے پاک فوج کے پختہ عزم کا اعادہ کیا۔
آرمی چیف نے کہا کہ شہداء کی یہ قربانیاں قومی عزم کی بنیاد ہیں، جو افواجِ پاکستان اور قانون نافذ کرنے والے اداروں کے عزم و حوصلے کو تقویت دیتی ہیں۔ انہوں نے کہا کہ دشمن عناصر کے مذموم عزائم کو ناکام بنانا اولین ترجیح ہے۔
آئی ایس پی آر کے مطابق آرمی چیف نے کہا کہ دیرپا استحکام و سلامتی یقینی بنانے کیلئے مربوط و مضبوط آپریشنز کے ذریعے پاک فوج قانون نافذ کرنیوالے اداروں کیساتھ مل کر امن کے دشمنوں کا تعاقب جاری رکھے گی۔
