چیف آف نیول سٹاف ایڈمرل نوید اشرف نے کہا ہے کہ پی ایم ایس ٹی پی۔جی ڈی پی اور بحری شعبے کی ترقی کیلئے نئے راستے کھولے گا۔آئی ایس پی آر کے مطابق پاکستان کے پہلے میری ٹائم سائنس اینڈ ٹیکنالوجی پارک کی گراؤنڈ بریکنگ تقریب کراچی ایکسپو سینٹر میں منعقد ہوئی جس کے مہمان خصوصی چیف آف نیول سٹاف ایڈمرل نوید اشرف تھے۔
اس موقع پر گفتگو کرتے ہوئے چیف آف نیول سٹاف ایڈمرل نوید اشرف نے کہا کہ پی ایم ایس ٹی پی میری ٹائم سائنسز، ٹیکنالوجی، کاروبار اور صنعت میں ترقی کی راہ ہموار کرے گا۔آئی ایس پی آر کے مطابق پی ایم ایس ٹی پی پاکستان میں اپنی نوعیت کا پہلا میری ٹائم سائنس پارک ہے جس کا مقصد بحری ٹیکنالوجیز، آرٹیفیشل انٹلیجنس و سائبر سیکیورٹی،اوشین رینیوایبل انرجی، سی فوڈ پروسیسنگ، جہاز سازی اور ساحلی سیاحت کو فروغ دینا ہے۔
آئی ایس پی آر کے مطابق پاکستان میری ٹائم سائنس اینڈ ٹیکنالوجی پارک ایک جدید تحقیقی اور ترقیاتی مرکز ہے، پی ایم ایس ٹی پی بحری وسائل اور ٹیکنالوجی کے شعبے کی ترقی کیلئے بنایا گیا ہے۔
