آئیڈیاز2024ء کے ڈائریکٹر میڈیا ڈیپو کموڈور اعتزاز خالد نے کہاہے کہ نمائش میں 55ممالک کے 330سے زائد وفود کو مدعو کیا گیا ہے،نمائش پاکستان کی سٹرٹیجک پوزیشننگ ،دفاعی صلاحیتوں کو دنیا کے سامنے لانے کا موقع فراہم ،کاروبار کو فروغ ،ٹیکنالوجی کی منتقلی اور دفاعی مینوفیکچرنگ تیز کرتی ہے۔
کراچی میں 19 سے 22 نومبر تک ہونیوالی دفاعی نمائش آئیڈیاز کے 12ویں ایڈیشن کی تعارفی تقریب کا انعقاد ایکسپو سنٹر میں کیا گیا جہاں افواج پاکستان کی رائفل ڈرل نے پیشہ ورانہ تربیت کا شاندار مظاہرہ پیش کیا۔ڈائریکٹر میڈیا ڈیپو کموڈور اعتزاز خالد نے آئیڈیاز 2024ء کے حوالے سے میڈیا کو بریفنگ دیتے ہوئے بتایا کہ آئیڈیاز 2024ء میں55ممالک کے 330سے زائد وفود کو مدعو کیا گیا ہے، 4روزہ نمائش میں متعدد سرگرمیاں شامل ہوں گی،مختلف ممالک اپنے سامان حرب کیساتھ اس میں شریک ہوں گے۔
انہوں نے کہا کہ یہ نمائش پاکستان کی دفاعی صنعت کو عالمی سطح پر پیش کرنے کا ایک اہم موقع فراہم کرتی ہے، اس سے پاکستان کی سٹرٹیجک پوزیشننگ اور دفاعی صلاحیتوں کو بھی دنیا کے سامنے لایا جاتا ہے۔ انہوں نے کہا کہ ہر دو سال بعد ہونیوالی یہ نمائش پاکستان کیلئے ایک پلیٹ فارم ہے جہاں وہ اپنے مقامی دفاعی مصنوعات کو دنیا کے سامنے پیش کر سکتا ہے جبکہ بین الاقوامی پارٹنرز کے ساتھ تعاون کے مواقع بھی حاصل کرتا ہے۔
انہوں نے کہا کہ آئیڈیاز 2024ء کا سب سے بڑا فائدہ یہ ہے کہ اس سے پاکستان کی دفاعی برآمدات میں اضافہ ہوتا ہے جس سے ملکی معیشت مزید مستحکم ہوتی ہے اور غیر ملکی وفود و دفاعی ٹیکنالوجی فراہم کرنیوالی کمپنیوں کیساتھ نیٹ ورکنگ اور کاروباری مواقع بھی حاصل ہوتے ہیں۔انہوں نے کہا کہ یہ نمائش نہ صرف کاروبار کو فروغ دیتی ہے بلکہ ٹیکنالوجی کی منتقلی اور دفاعی مینوفیکچرنگ کو بھی تیز کرتی ہے، اس طرح یہ پاکستان کیلئے اہم اقتصادی و اسٹرٹیجک ایونٹ ثابت ہوتی ہے۔
