وزیراعظم شہباز شریف سے پیپلزپارٹی کے چیئرمین بلاول بھٹو زرداری نے لاہور میں ان کی رہائشگاہ پر ملاقات کی جس میں آئینی ترمیم اور سیاسی صورتحال پر گفتگو کی گئی۔
چیئرمین پیپلزپارٹی بلاول بھٹو وزیراعظم شہباز شریف سے ملاقات کیلئے لاہور میں ان کی رہائشگاہ ماڈل ٹاؤن پہنچے، گورنر پنجاب سردار سلیم حیدر اور سابق وزیراعظم راجہ پرویز اشرف بھی بلاول بھٹو کے ہمراہ تھے۔
مسلم لیگ ن کے رہنما اعظم نذیر تارڑ، رانا ثناء اللہ اور سردار ایاز صادق بھی ملاقات میں موجود تھے۔
ذرائع کے مطابق ملاقات میں ستائیسویں آئینی ترمیم پر بات چیت کی گئی ، بلاول بھٹو نے 26 ویں آئینی ترمیم کو بھی تاریخی قرار دیا۔
وزیراعظم شہباز شریف کا کہنا تھا کہ 26 ویں آئینی ترمیم کی منظوری کا کریڈٹ اتحادی جماعتوں کو جاتا ہے، پہلے بھی عوامی خدمت سے پیچھے نہیں ہٹے ، اب بھی پیچھے نہیں ہٹیں گے۔
بلاول بھٹو نے کہا کہ جمہوریت اور پارلیمنٹ کی مضبوطی کیلئے مل کر چلیں گے ، غیر جمہوری طاقتوں کا راستہ روکنے کیلئے26 ویں آئینی ترمیم کارگر ثابت ہو گی۔
