کراچی: سندھ کے سینئر وزیر شرجیل میمن نے سندھ طاس معاہدے بارے عالمی عدالت کے فیصلے کا کریڈٹ بلاول بھٹو کو دیتے ہوئے کہا ہے کہ عوام کو سہولیات فراہمی کیلئے کوشاں ہیں، پیپلز پارٹی کو وفاق میں شمولیت کی کوئی دعوت نہیں دی گئی۔
کراچی میں پریس کانفرنس کرتے ہوئے شرجیل میمن نے کہا کہ سندھ حکومت صوبے میں بہتری کیلئے کوشاں ہے، پاکستان میں بہترین صحت کی سہولیات سندھ حکومت فراہم کر رہی ہے، لوگ ملک بھر سے یہاں علاج کروانے آرہے ہیں۔
انہوں نے بتایا کہ سندھ کے بجٹ میں گریڈ 1سے 16تک کے ملازمین کی تنخواہ میں 12فیصد جبکہ گریڈ 16سے اوپر کے ملازمین کی تنخواہ میں 10فیصد اضافہ کیا گیا ہے۔ انہوں نے بتایا کہ بجٹ میں ریٹائرڈ ملازمین کی پنشن بھی بڑھائی گئی ہے۔
انہوں نے کہا کہ کے الیکٹرک ناکام ہوچکی ہے، مختلف علاقوں میں بارہ ، بارہ گھنٹے لوڈ شیڈنگ ہو رہی ہے جس سے عوام کو شدید مشکلات کا سامنا ہے۔ انہوں نے کہا کہ بلاول بھٹو نے پاکستان کا حقیقی موقف دنیا کے سامنے رکھا، اور بھارت کو بے نقاب کیا۔
انہوں نے کہا کہ بلاول نے سندھ طاس معاہدے پر جو کہا اسی موقف کی عالمی عدالت نے تائید کی، عالمی عدالت کے فیصلے کا کریڈٹ بلاول بھٹو کو جاتا ہے۔
ایک سوال پر انہوں نے بتایا کہ فی الحال پیپلز پارٹی کو وفاق میں شمولیت کی کوئی آفر نہیں کی گئی۔ انہوںنے شمالی وزیرستان میں شہید 13فوجی کو خراج عقیدت پیش کرتے ہوئے کہا کہ ہماری فورسز دشمن کو ہر محاذ پر نقصان پہنچا رہی ہیں، 14خوارجیوں کو جہنم واصل کرنے پر سیکیورٹی فورسز کو خراج تحسین پیش کرتے ہیں ۔ انہوں نے کہا کہ دہشت گردی کے ناسور کے خاتمے تک اس کیخلاف جنگ جاری رکھیں گے۔
