صدر مملکت آصف زرداری نے فلسطینیوں کی سیاسی، سفارتی، انسانی اور اخلاقی حمایت جاری رکھنے کے عزم کا اعادہ کرتے ہوئے کہا ہے کہ فلسطینیوں کیلئے ہماری حمایت انسانیت، انصاف اور برابری کی بنیادی اقدار پر قائم ہے، مسجد اقصی میں فلسطینی بھائیوں کیساتھ نماز ادائیگی کا خواہاں ہوں، دعاء ہے فلسطینی عوام کی جدوجہد اور ہمت دنیا کے سوئے ضمیر کو جگائے اور دنیا میں انصاف و امن کی جیت ہو۔
صدر مملکت نے عالمی یوم یکجہتی فلسطین پر جاری بیان میں کہا کہ بہادر فلسطینی عوام کو دل کی گہرائیوں سے سلام پیش کرتا ہوں جنہوں نے بے مثال ہمت، ثابت قدمی اور غیر متزلزل حوصلے کے ساتھ تاریخ میں ایک نیا باب رقم کیا ہے۔
صدر نے کہا کہ پاکستان فلسطین کے ساتھ اپنے دیرینہ اور قریبی برادرانہ تعلقات کو بہت اہمیت دیتا ہے۔
انہوں نے کہا کہ پاکستان نے ہمیشہ غزہ میں اسرائیلی قابض فوج کے مظالم کی شدید مذمت کی ہے اور ہر عالمی فورم پر فلسطینیوں کیلئے آواز اٹھائی ہے۔
انہوں نے کہا کہ ہم مسلسل فوری اور مستقل جنگ بندی، انسانی امداد کی بلا رکاوٹ فراہمی، شہریوں کے تحفظ اور اسرائیلی جنگی جرائم پر مکمل احتساب کا مطالبہ کرتے رہے ہیں۔
انہوں نے کہا کہ اقوام متحدہ، او آئی سی، آئی سی جے اور دیگر عالمی فورمز پر بھی پاکستان فلسطینی عوام کے بنیادی اور ناقابل تنسیخ حقوق کے لیے مسلسل سرگرم رہا ہے۔
صدر مملکت نے کہا کہ غزہ امن معاہدے میں بھی پاکستان نے مثبت اور تعمیری کردار ادا کیا، اس امید کے ساتھ کہ اسرائیلی ظلم و جارحیت سے فلسطینی عوام پر ڈھائے گئے ناقابل تصور دکھوں کا خاتمہ ہوسکے گا۔
انہوں نے کہا کہ پاکستان اپنے فلسطینی بھائیوں اور بہنوں کی ہر طرح کی سیاسی، سفارتی، انسانی اور اخلاقی حمایت جاری رکھے گا، ہم اپنے اس موقف کا اعادہ کرتے ہیں کہ فلسطین جون 1967سے پہلے والی سرحدوں کے مطابق ایک آزاد، خودمختار اور مضبوط ریاست کے طور پر قائم ہو اور اس کا دارالحکومت القدس الشریف ہو۔
صدر مملکت نے کہا کہ میری دلی خواہش ہے کہ ایک دن مجھے مسجد اقصی میں اپنے فلسطینی بھائیوں کے ساتھ نماز ادا کرنے کی سعادت حاصل ہو۔
دعاء ہے کہ فلسطینی عوام کی جدوجہد اور ہمت دنیا کے سوئے ہوئے ضمیر کو جگائے اور دنیا میں انصاف اور امن کی جیت ہو۔
