اسلام آباد : وزیراعظم شہباز شریف نے کہا ہے کہ ملکی معیشت میں ایف بی آر کا کردار کلیدی ہے،، اچھے کارکردگی دکھانے والے افسران کو اعزاز دینے بارے حکمت عملی ترتیب دی جائے، مختلف عدالتوں ،ٹریبونلز میں زیر التوا کیسز بارے بہترین وکلاء کی خدمات حاصل کی جائیں،کسٹمز ایپلٹ ٹریبونلز کا قیام بھی عمل میں لایا جائے۔
تفصیلات کے مطابق وزیراعظم شہباز شریف کی زیر صدارت ایف بی آر امور پر اہم اجلاس کا انعقاد ہوا جس میں وفاقی وزراء اور متعلقہ افسران و حکام نے شرکت کی۔ وزیراعظم کو بریفنگ دیتے ہوئے بتایا گیا کہ ایپلٹ ٹریبونلز ان لینڈ ریونیو کے قیام کے حوالے سے کام کا آغاز ہو چکا ہے، ان ٹریبونلز میں ججز کی تعیناتی کیلئے شفاف تحریری امتحان کا انعقاد کیا جائے گا۔
اس موقع پر وزیراعظم شہباز شریف نے کہا کہ ملکی معیشت میں ایف بی آر کا کلیدی کردار ہے، ہمیں مل جل کر ملکی ترقی کیلئے کام کرنا ہوگا۔ انہوں نے کہا کہ ایف بی آر کے مختلف عدالتوں اور ٹریبونلز میں زیر التوا کیسز کے حوالے سے بہترین وکلا کی خدمات حاصل کی جائیں۔انہوں نے کہا کہ ایف بی آر میں جاری اصلاحات اور محصولات کے حوالے سے ہفتہ وار جائزہ اجلاس کی صدارت خود کروں گا، ٹیکس سے متعلق مقدمات کو جلد نمٹانے کیلئے ان لینڈ ریونیو ایپلٹ ٹریبونلز کیساتھ کسٹمز ایپلٹ ٹریبونلز کا قیام بھی عمل میں لایا جائے۔ وزیراعظم نے ہدایت کی کہ اچھی کارکردگی دکھانے والے ایف بی آر افسران کو اعزاز دینے کیلئے حکمت عملی ترتیب دی جائے۔
