پی ٹی آئی نے سپریم کورٹ میں پنجاب الیکشن ٹریبونلز کی تشکیل کے فیصلے کیخلاف درخواست دائرکردی۔ سیکرٹری جنرل پی ٹی آئی سلمان اکرم راجہ کی جانب سے سپریم کورٹ کے 30ستمبر کے فیصلے پر دائر نظر ثانی درخواست میں موقف اپنایا گیاہے کہ چیف جسٹس لاہور ہائیکورٹ اور چیف الیکشن کمشنر کے درمیان ملاقات الیکشن ٹریبونلز کی تبدیلی کی وجہ نہیں بن سکتی، الیکشن ٹریبونل کا جج کون ہوگا؟یہ فیصلہ چیف جسٹس کا اختیار ہے۔
درخواست میں کہا گیا کہ 4اپریل کو لاہور ہائیکورٹ رجسٹرار نے 6الیکشن ٹریبونلز کو نوٹیفائی کیا، چیف جسٹس لاہور ہائیکورٹ اور چیف الیکشن کمشنر کی ملاقات کے بعد الیکشن ٹریبونلز کیلئے حاضر سروس ججز کے نام واپس ہوگئے۔درخواست میں سپریم کورٹ سے 30ستمبر کے فیصلے پر نظر ثانی کی استدعا کی گئی ہے۔
