راولپنڈی: سربراہ اے ایم ایل شیخ رشید نے کہا ہے کہ کرائے کی حکومت ملک کو بحرانوں سے نکالنے میں ناکام ہوگئی ہے، ذمہ داران فوری حل تلاش کریں، عوام کیساتھ جو بیت رہی ہے وہ اس سے قبل کبھی نہیں ہوا، ریاست، معیشت اور سیاست بحران کا شکار ہیں۔
تفصیلات کے مطابق ایک ویڈیو بیان میں سربراہ اے ایم ایل شیخ رشید نے کہا کہ گزشتہ روز تاجروں نے تاریخی ہڑتال کرکے حکومت پر عدم اعتماد کر دیا،کوئی ملک اور ادارہ موجودہ حکمرانوں کو پانچ ڈالر دینے کو تیار نہیں، آئی ایم ایف کے 4 ستمبر اجلاس ایجنڈا میں پاکستان کو شامل نہیں کیا گیا، آج ریاست، معیشت اور سیاست شدید بحران کا شکار ہیں۔
انہوں نے کہا کہ بلوچستان کے حالات شدید پریشان کن اور حساس ہیں ہمیں پاکستان کا سوچنا ہوگا پاکستان ہے تو ہم ہیں، یہ ملک ہی ہمارا جینا مرنا ہے۔انہوں نے کہا کہ میری دوستی ایک ہی آدمی سے تھی ہے اور رہے گی عوام کے ساتھ جو بیت رہی ہے وہ اس سے قبل کبھی نہیں ہوا، تعلیمی ادارے تباہ ہورہے ہیں، عوام لگائے گئے بھاری ٹیکسز ادا نہیں کرسکتے ان کی قوت خرید ختم ہوگئی ہے۔
انہوں نے کہا کہ کرائے کی حکومت ملک کو بحرانوں سے نکالنے میں مکمل ناکام ہوگئی ہے، ذمہ داران سے اپیل کرتا ہوں فوری حل تلاش کریں، 30 ستمبر تک ملکی سیاست کا اونٹ کسی بھی سائیڈ بیٹھ جائے گا۔
