اسلام آباد: پاکستان نے واضح کیا ہے کہ دہشت گردی ،شہریوں کے قتل میں ملوث کسی گروہ سے بات نہیں کی جائے گی،افغان مہاجرین کی واپسی کا پہلا مرحلہ اختتام کے قریب ہے،ہمسایہ ممالک سے بہتر تعلقات کا قیام پاکستان کا حق ہے، اسرائیلی فورسزکی فلسطینی کیمپ پربمباری قابل مذمت ہے،عالمی برادری احتساب کرے،9 مئی میں ملوث عناصر کا آئین و قانون کے مطابق احتساب کریں گے۔
تفصیلات کے مطابق ہفتہ وار پریس بریفنگ دیتے ہوئے ترجمان دفتر خارجہ ممتاززہرا بلوچ نے بتایا کہ پاکستان اپنے لوگوں اور املاک کی حفاظت پر عمل پیرا ہے، دہشت گردی اور شہریوں کے قتل میں ملوث کسی گروہ سے بات نہیں کی جائے گی۔ انہوں نے کہا کہ افغانستان کی خود مختاری کا احترام ہے مگر ا فغان حکومت اپنی سرزمین کاہمسایوں کیخلاف استعمال بند کرے۔
ترجمان نے کہا کہ پاکستان افغان شہریوں کی دہری شہریت کو تسلیم نہیں کرتا،پاکستان میں مقیم افغانی بطور مہاجر رہ رہے ہیں جس کیلئے انہیں پی او آر کارڈز جاری کیے گئے ہیں۔ انہوں نے کہا کہ پاکستان افغان مہاجرین کی منتقلی کیلئے جرمنی، کینیڈا، آسٹریلیا سمیت دیگر ممالک کے ساتھ مل کر کام کررہا ہے۔
انہوں نے بتایا کہ افغان عبوری حکومت کے بعد پاکستان آنیوالے 9ہزار افغانی جرمنی، 6ہزار آسٹریلیا اور 1127امریکا جا چکے ہیں۔انہوں نے بتایاکہ افغان مہاجرین کی وطن واپسی کا پہلا مرحلہ مکمل ہونے کے قریب ہے، افغانیوں سمیت غیرقانونی طور پر مقیم دیگر غیرملکیوں کو ملک بدر کرنے کا دوسرا مرحلہ حکومت پاکستان کی ہدایات پر شروع ہوگا، نائب وزیراعظم و وزیرخارجہ دونوں ممالک کی مشاورت سے افغانستان کا دورہ کریں گے۔
انہوں نے کہا کہ پاکستان کا حق ہے کہ وہ اپنے ہمسایہ ممالک سے تعلقات قائم کرے، پاکستان اور روس کے تعلقات مثبت سمت میں ہیں، ایس سی او کی سائیڈ لائن پر دونوں وزرائے مملکت کی ملاقات اس کی مثال ہے۔ انہوں نے کہا کہ بھارت مسئلہ کشمیر سے توجہ ہٹانے کیلئے مسلسل الزام تراشیاں کر رہا ہے، 13جولائی کوکشمیریوں کی شہادت پرانہیں خراج تحسین پیش کرتے ہیں۔
انہوں نے کہا کہ پاکستان اور امریکہ کے درمیان تعلقات کو مزید مستحکم کرنے کیلئے دونوں ممالک مختلف شعبوں میں کام کررہے ہیں جبکہ دونوں ممالک کے درمیان دفاع اور مشترکہ مشقوں کی تاریخ ہے جس سے دونوں استفادہ کرتے ہیں۔
انہوں نے کہا کہ اسرائیلی فورسزکی فلسطینی کیمپ پربمباری کی سخت مذمت کرتے ہیں، عالمی برادری مظالم پر اسرائیل کا احتساب کرے۔ایک سوال پر انہوں نے کہا کہ سانحہ 9 مئی میں ملوث عناصر کا آئین و قانون کے مطابق احتساب کیا جائے گا۔
