وزیراعلی خیبرپختونخوا علی امین گنڈا پور نے کہا ہے کہ پولیو کا مکمل خاتمہ ،بچیوں کی تعلیم حکومتی ترجیحات ہیں، ضم اضلاع کی 36ہزار بچیوں کو تعلیمی وظائف دیئے جا رہے ہیں،مذہبی و ثقافتی اقلیتوں کی فلاح و بہبود کیلئے سنجیدہ اقدامات کر ر ہے ہیں، تمام عبادت گاہوں کو سولر سسٹم فراہمی جاری ہے،
اقوام متحدہ عملے کی سکیورٹی یقینی بنانے کیلئے ہر ممکن اقدامات کئے جائیں گے۔بدھ کو وزیر اعلی خیبر پختونخوا علی امین گنڈاپور سے اقوام متحدہ کے ریزیڈنٹ کوآرڈنیٹر برائے پاکستان محمد یحییٰ کی قیادت میں اعلی سطحی وفد نے ملاقات کی جس میں ہیروکو، افکی بوٹسمین، کارلس عباس گیہا اور دیگر شامل تھے۔اس موقع پر فیصل امین گنڈاپور، ایڈیشنل چیف سیکرٹری منصوبہ بندی و صوبائی حکومت کے دیگر اعلی حکام بھی موجود تھے۔ ملاقات میں اقوام متحدہ کے ذیلی اداروں کی جانب سے خیبر پختونخوا میں جاری مختلف عوامی فلاح و بہبود کی سرگرمیوں پر تبادلہ خیال کیا گیا۔
ملاقات میں صحت کے شعبے خصوصا پولیو وائرس کے خاتمے، زچہ و بچہ کی صحت، اور نوزائیدہ بچوں کی اموات کی روک تھام بارے امور پر گفتگو کی گئی۔ وزیر اعلی علی امین نے کہا کہ پولیو کے مکمل خاتمے کو اپنی اولین ترجیحات میں شامل کیا ہوا ہے اس بارے بھرپور اور سنجیدہ اقدامات اٹھائے جا رہے ہیں۔ انہوں نے کہا کہ عالمی پارٹنر اداروں کے تعاون سے انسداد پولیو مہم مزید موثر اور نتیجہ خیز بنائی جارہی ہے ۔ انہوںنے بتایاکہ تعلیم، خصوصا بچیوں کی تعلیم ترجیحی حکومتی شعبوں میں شامل ہے ،ضم اضلاع میں بچیوں کی شرح خواندگی بڑھانے کیلئے ٹھوس اقدامات کیے جا رہے ہیں۔
انہوں نے بتایا کہ ضم اضلاع کی 36ہزار بچیوں کو تعلیمی وظائف دیئے جا رہے ہیں تاکہ انہیں تعلیم کی جانب راغب کیا جا سکے۔ماحولیات، کلچر، سیاحت اور دیہی ترقی بارے امور پر تبادلہ خیال کرتے ہوئے علی امین نے کہا کہ صوبائی حکومت صوبے میں بسنے والی تمام مذہبی و ثقافتی اقلیتوں کی فلاح و بہبود کیلئے سنجیدہ اقدامات کر رہی ہے جبکہ تمام عبادت گاہوں کو سولر سسٹم فراہمی کا عمل بھی جاری ہے۔
ملاقات میں خیبر پختونخوا میں کام کرنیوالے اقوام متحدہ کے ذیلی اداروں کے عملے کی سیکیورٹی ، نقل و حمل بارے گفتگو کرتے ہوئے وزیر اعلی نے یقین دلایا کہ اقوام متحدہ کے اداروں کیساتھ مزید مربوط انداز میں کام کیا جائے گا اور عملے کی سکیورٹی یقینی بنانے کیلئے ہر ممکن اقدامات کئے جائیں گے۔اس موقع پر اقوام متحدہ کے وفد نے خیبر پختونخوا میں شعبہ صحت میں حکومتی اقدامات کوسراہا اور مختلف سماجی شعبوں میں عوامی فلاح و بہبود کیلئے حکومتی کاوشوں کی تعریف کی۔
