) قومی اسمبلی میں اپوزیشن لیڈر عمرایوب نے پی ٹی آئی میں کسی بھی بلاک کی تردید کرتے ہوئے کہا ہے کہ مصنوعی حکومت ملک نہیں چلا سکتی،26ویں ترمیم کا طریقہ کار ہی غلط تھا،ٹریکٹر کو موٹروے پر لگا دیں یا موٹروے گاڑی کو کھیت میں، دونوں کے چار ٹائر مگر کام مختلف ہیں،
امید ہے نئے چیف جسٹس صحیح طریقے سے فرائض ادا کریں گے۔اے ٹی سی لاہور کے باہر میڈیا سے گفتگو کرتے ہوئے پی ٹی آئی رہنماء عمر ایوب نے پی ٹی آئی میں گروپ بندی کی تردید کرتے ہوئے کہا کہ ہم ایک اپنا نظریہ ہے اور ہم اسی پر قائم ہیں، پی ٹی آئی میں عمران خان کے علاوہ کوئی دوسرا بلاک نہیں ہے،اس وقت ہمارے سیکرٹر ی جنرل سلمان اکرم راجہ ہیں۔ انہوں نے کہا کہ زین قریشی نے کوئی ووٹ نہیں دیا، ہمارے باقی ساتھیوں کو کمیٹی نے شوکاز نوٹس جاری کر دیئے ہیں۔
انہوں نے کہا کہ منصوعی حکومت ملک نہیں چلا سکتی، ملک میں افرا تفری ہے،بلوچستان کے حالات دیکھ لیں، غربت، مہنگائی،بیروزگاری، کرپشن عروج پر ہے، حکومت کا کسی چیز پر کنٹرول نہیں ہے، یہ مہنگائی سے توجہ ہٹانا چاہتے ہیں،پورے ملک میں افراتفری ہے۔
انہوں نے کہا کہ پنجاب میں کچے کے ڈاکوؤں کو یہ کنٹرول نہیں کرسکتے۔ایک سوال پر انہوں نے کہا کہ 26ویں ترمیم کا طریقہ کار ہی غلط تھاجس پارلیمنٹ میں ترمیم پاس ہوئی اس حکومت کا وجود ہی غلط ہے، یہ فارم 47کی حکومت ہے، سینیٹ بھی مکمل نہیں، خیبرپختونخوا کی سیٹیں نہیں، خواتین سیٹوں پر الیکشن کمیشن نے ڈنڈی نہیں ڈنڈا مارا ہوا ہے۔
انہوں نے کہا کہ آپ ٹریکٹر کو موٹروے پر لگا دیں یا موٹروے کی گاڑی کو کھیت میں، دونوں کے چار ٹائر ہی ہوتے ہیں لیکن کام مختلف ہوتے ہیں۔ انہوں نے کہا کہ مولانا فضل الرحمن بھی اپوزیشن میں ہیں، ان کا اور ہمارا ہدف ایک ہی ہے، ہم تحریک تحفظ آئین پاکستان کے ممبر ہیں۔ایک اور سوال پر انہوں نے کہا کہ توقع ہے نئے چیف جسٹس صحیح طریقے سے فرائض ادا کریں گے۔
