صنعا: یمن کی حوثی جماعت نے خبردار کیا ہے کہ اسرائیلی بندرگاہوں کے ساتھ منسلک بین الاقوامی کاروباری کمپنیوں کے جہازوں کو کسی بھی مقام پر نشانہ بنایا جا سکتا ہے، چاہے ان کی منزل کچھ بھی ہو، تمام کمپنیاں اسرائیلی بندرگاہوں سے اپنا لین دین فوری طور پر بند کریں۔
غیرملکی میڈیا کے مطابق حوثی جماعت کے ترجمان یحیی سریع نے ایک بیان میں کہا ہے کہ یہ اقدام اسرائیل کے خلاف ان کی نام نہاد چوتھی عسکری کارروائی کا حصہ ہے، جو کمپنیاں اس انتباہ کو نظرانداز کریں گی، ان کے جہاز حملوں کی زد میں آئیں گے، چاہے وہ دنیا کے کسی بھی سمندر میں موجود ہوں۔
انہوں نے واضح کیا کہ اگر غزہ پر جنگ ختم کی جاتی ہے اور محاصرہ ختم کیا جاتا ہے تو یہ تمام "عسکری کارروائیاں” روک دی جائیں گی۔
