وزیراعلی پنجاب مریم نواز نے کہا ہے کہ عوامی خدمت کے سفر کو مزید تیزی سے آگے بڑھانے کا عزم کرتے ہوئے کہا ہے کہ تاریخ میں پہلی بار پسماندہ و چھوٹے اضلاع سے ہر بڑے منصوبے کا آغاز کر رہے ہیں، ستھرا پنجاب پروگرام کو دنیا کا سب سے بڑا ویسٹ مینجمنٹ پروگرام بنا رہے ہیں۔
بدھ کو وزیراعلی مریم نواز سے میانوالی کے ارکان قومی و صوبائی اسمبلی کے وفد نے ملاقات کی، ملاقات کرنے والوں میں علی حیدر نور خان، عبید اللہ خان شادی خیل، امانت اللہ خان شادی خیل، عدیل عبد اللہ خان رخڑی، ملک فیروز جوئیہ اور ملک سجاد خان بھچڑ شامل تھے۔
ملاقات میں ملکی سیاسی صورتحال، پنجاب میں جاری ترقیاتی پراجیکٹس اور امن وامان پر تفصیلی گفتگو ہوئی۔
ارکان قومی و صوبائی اسمبلی نے وزیراعلی کو اعزازیہ کارڈ برائے امام مسجد دینے پر خراج تحسین پیش کیا، وفد نے صوبے کے تمام سرکاری ہسپتالوں میں مفت ادویات کی فراہمی کو سراہا اور میانوالی میں پہلی پبلک ٹرانسپورٹ الیکٹروبس کا تحفہ دینے پر اظہار تشکر کیا۔
اراکین اسمبلی نے کہا کہ میانوالی کے عوام کیلئے الیکٹروبس کسی معجزے سے کم نہیں، میانوالی میں بیوٹیفکیشن اور ستھرا پنجاب پراجیکٹ سے شہر کی خوبصورتی میں نمایاں اضافہ ہوا ہے۔
وزیراعلی نے کہا کہ سرگودھا کارڈیالوجی سے ضلع میانوالی کے امراض قلب کے مریض بھی مستفید ہو سکیں گے، تاریخ میں پہلی بار پسماندہ اور چھوٹے اضلاع سے ہر بڑے پراجیکٹ کا آغاز کر رہے ہیں، عوامی خدمت کے سفر کو مزید تیزی سے آگے بڑھائیں گے۔
وزیراعلی نے کہا کہ ستھرا پنجاب پروگرام کو دنیا کا سب سے بڑا ویسٹ مینجمنٹ پروگرام بنا رہے ہیں۔
