شمالی غزہ میں فضاسے امداد گرانے کا عمل دوبارہ شروع،ذرائع

بیان میں کہا گیا ہے کہ فضا سے گرائے جانے والے امدادی سامان میں آٹا، چینی اور ڈبوں میں بند خوراک شامل ہے، جو بین الاقوامی تنظیموں کی جانب سے فراہم کی گئی ہے۔ اس کے ساتھ ہی غزہ میں اقوام متحدہ کے قافلوں کی حفاظت کے لئے مخصوص انسانی راہداریوں کے قیام کے منصوبے کا بھی اعلان کیا گیا ہے۔

متحدہ عرب امارات (یو اے ای) نے اعلان کیا ہے کہ اس نے غزہ کی پٹی میں فضاسے انسانی امداد گرانے کا عمل فوری طور پر دوبارہ شروع کرنے کا فیصلہ کیا ہے۔

سوشل میڈیا پلیٹ فارم ایکس پر جاری کئے گئے ایک پیغام میں یو اے ای کے وزیر خارجہ شیخ عبداللہ بن زاید النہیان نے کہا کہ یو اے ای کی امدادی کوششیں زمین، فضا اور سمندری راستوں سے جاری رہیں گی تاکہ غزہ کے سب سے زیادہ متاثرہ لوگوں کی فوری ضروریات کو پورا کیا جا سکے۔

فضا سے امداد گرانے کا عمل دوبارہ شروع کرنے کا اعلان ایسے وقت میں ہوا ہے جب انسانی ہمدردی کی تنظیموں نے غزہ میں بھوک کی صورتحال خراب ہونے سے خبردار کیا جہاں مارچ سے اسرائیل نے تمام سرحدیں بند کر رکھی ہیں جس کی وجہ سے بنیادی ضروریات تک رسائی شدید متاثر ہوئی ہے۔