لاہور : لاہور ہائیکورٹ نے اے ٹی سی عدالتوں کے تمام ججوں کو موبائل میں کال ریکارڈ کرنے والی ایپس رکھنے کا حکم دے دیا۔ تفصیلا ت کے مطابق لاہور ہائیکورٹ میں جج جسٹس شاہد کریم نے اے ٹی سی سرگودھا کے جج کو مبینہ ہراساں کرنے کیخلاف دائر کیس پر سماعت کی۔
جسٹس شاہد کریم نے ازخود نوٹس کو رٹ پٹیشن میں تبدیل کرتے ہوئے کہا کہ میں اس کیس میں پراسیکیوٹر اور عدالتی معاون مقرر کروں گا۔وفاقی حکومت کے وکیل نے کہا کہ اگر ہمیں پتہ چلے کسی نے جج سے ملنے کی کوشش کی تو ہم تفتیش کیلئے تیار ہیںجس پر جسٹس شاہد کریم نے کہا کہ عدالت ہدایت جاری کرے گی ،وزیراعظم آئی ایس آئی اور آئی بی سے متعلق ذمہ داری اٹھائیں، اس کے بعد بھی کچھ ہوا تو ہم براہ راست وزیر اعظم سے پوچھیں گے، وزیر اعظم کو ذمہ داری لینا ہوگی، آئی بی اور آئی ایس آئی وزیرِ اعظم کے ماتحت ہیں۔
عدالت نے کہا کہ آئی جی پنجاب کو ہدایت کی جائے گی آئندہ راستے بند کرنے پر جج سے مشاورت کے بعد قدم اٹھایا جائے، وہ اس بارے تمام پولیس افسران کو ہدایت جاری کریں۔عدالت نے اے ٹی سی عدالتوں کے تمام ججوں کو موبائل میں کال ریکارڈ کرنے والی ایپس رکھنے کی ہدایت کرتے ہوئے کہا کہ اگر کوئی ایسی فون کال آئے تو اسے ریکارڈ کیا جائے۔بعد ازاں عدالت نے کیس کی سماعت جولائی کے دوسرے ہفتے تک ملتوی کر دی۔
