پانچ ٹی ٹوئنٹی میچوںکی سیریز کے آخری میچ میں نیوزی لینڈ نے پاکستان کو 8 وکٹوں سے شکست دیکر سیریز 4-1سے اپنے نام کرلی، میزبان ٹیم نے ٹم سیفرٹ کے تیزرفتار 97 رنز کی بدولت 129 رنز کا ہدف 10 اوورز میں حاصل کرلیا ۔بدھ کو ویلنگٹن میں کھیلے جانے والے سیریز کے آخری میچ میں نیوزی لینڈ نے ٹاس جیت کر پاکستان کو پہلے کھیلنے کی دعوت دی۔پاکستان نے مقررہ 20 اوورز میں 9 وکٹوں کے نقصان پر 128 رنزبنائے، نصف سنچری بنانے والے کپتان سلمان علی آغا اور 28 رنز بنانے والے شاداب خان کے علاوہ کوئی قابل ذکر کھیل پیش نہ کرسکا جبکہ 8 بلے باز ڈبل فگر میں بھی داخل نہ ہوسکے۔
حسن صفر، محمد حارث 11، عمیر یوسف اور عثمان خان 7،7 رنز بناکر پویلین لوٹے جبکہ عبدالصمد بھی 4 رنز ہی بناسکے۔ شاداب خان 28، جہانداد خان ایک، حارث روف 6 جبکہ سفیان مقیم اور محمد علی کھاتا کھولے بغیر پویلین لوٹے۔نیوزی لینڈ کی جانب سے جیمز نیشم (جمی نیشم) نے پانچ وکٹیں حاصل کیں، اس کے علاوہ جیکب ڈفی 2 ، بین سیرز اور ایش سوڈھی ایک ایک وکٹ لینے میں کامیاب رہے۔جواب میں کیوی بلے بازوں نے دھواں دھار بیٹنگ کرتے ہوئے 2 وکٹوں کے نقصان پر 129 رنز کا ہدف 10 اوورز میں حاصل کرلیا۔آخری میچ میں قومی ٹیم سے فاسٹ بالر شاہین شاہ آفریدی، ابرار احمد، عرفان خان نیازی، خوشدل شاہ اور عباس آفریدی کو ڈراپ کیا گیا ہے جبکہ قومی ٹیم میں عمیر بن یوسف، عثمان خان، جہانداد خان، سفیان مقیم اور محمد علی کو شامل کیا گیا ہے۔ پاکستانی سکواڈ میں کپتان سلمان علی آغا، محمد حارث، حسن نواز، عمیر بن یوسف، عثمان خان، شاداب خان، عبدالصمد، جہانداد خان، حارث رف، سفیان مقیم اور محمد علی شامل ہیں۔ کیوی ٹیم کپتان مائیکل بریسویل، ٹم سیفرٹ، فن ایلن، مارک چیپمین، ڈیرل مچل، جمی نیشم، مچل ہے، ایش سوڈھی، جیکب ڈفی، بین سیئرز اور ول اوورکے پر مشتمل ہے۔
