بھارت میں زیادتی و جعلی میڈیکل سرٹیفکیٹس بنانے کے دباؤ کا شکار خاتون ڈاکٹر نے خودکشی کرلی۔
بھارتی میڈیا کے مطابق مہاراشٹر کے ڈسٹرکٹ ہسپتال میں تعینات 26 سالہ خاتون ڈاکٹر نے خودکشی سے قبل چار صفحات پر مشتمل خط چھوڑا ہے جس میں خاتون ڈاکٹر نے پولیس سب انسپکٹر پر چار بار جنسی زیادتی کا نشانہ بنانے کا الزام عائد کرتے ہوئے انکشاف کیا کہ اس پر متعدد بار مجرموں کیلئے جعلی فٹنس سرٹیفکیٹس جاری کرنے کا کیلئے دبائو ڈالا گیا، انکار پر شدید ذہنی و جسمانی اذیت دی گئی۔
خاتون نے لکھا کہ گزشتہ پانچ ماہ سے پولیس افسر گوال بڈکے مسلسل دباؤ اور ہراسانی نے زندگی اجیرن بنا دی تھی، ایک موقع پر جعلی سرٹیفکیٹ بنانے سے انکار پر رکن پارلیمان نے بھی سنگین نتائج بھگتنے کی دھمکی دی۔
خاتون ڈاکٹر نے لکھا ہے کہ اس نے پولیس کے اعلی حکام کو متعدد شکایات بھیجیں مگر کوئی کارروائی نہیں ہوئی، مکان مالک کیخلاف بھی ہراسانی کی شکایت درج کروائی مگر پولیس نے کان نہیں دھرا۔
میڈیا رپورٹ کے مطابق ڈاکٹر کی خودکشی کے بعد پولیس نے سب انسپکٹر گوال بڈنے اور مکان مالک کیخلاف ریپ و خودکشی پر اکسانے کے الزامات کے تحت مقدمہ درج کرکے مزید تفتیش شروع کردی ہے۔
