اسلام آباد: وزیراعظم شہباز شریف نے کہا ہے کہ ملک کے پہلے جدید ٹیکنالوجی پارک سے آئی ٹی برآمدات میں 7 کروڑ ڈالر اضافہ، ملازمتوں کے 10 ہزار مواقع پیدا ہوں گے، ملکی تاریخ میں پہلی بار آئی ٹی کیلئے 180 ارب روپے کا بجٹ مختص کیا گیا ہے، کورین کمپنی سے منصوبہ آئندہ سال جون کی بجائے رواں سال اکتوبر میں مکمل کرنے کی درخواست کی ہے۔
تفصیلات کے مطابق وزیراعظم شہباز شریف کی زیر صدارت اسلام آباد میں ٹیکنالوجی پارک کی تعمیرات میں پیشرفت بارے جائزہ اجلاس کا انعقاد ہوا۔ اجلاس کو بتایا گیا کہ ٹیکنالوجی پارک کا منصوبہ 14.9ایکڑ اراضی پر تعمیر کیا جا رہا ہے، منصوبے میں بین الاقوامی معیار کا ڈیٹا سینٹر بھی تعمیر کیا جا رہا ہے۔
اس موقع پر گفتگو کرتے ہوئے وزیراعظم شہباز شریف نے کہا کہ آئی ٹی پارک کی تعمیر کی 70فیصد لاگت جنوبی کوریا کی حکومت دے گی جس پر اس کے شکر گزار ہیں۔ انہوں نے بتایا کہ آئی ٹی پارک پر لاگت کا تخمینہ 25ارب روپے ہے، جنوبی کوریا کی حکومت تعمیر میں 7کروڑ ڈالر خرچ کر رہی ہے، جنوبی کوریا نے انتہائی آسان شرائط پر قرض فراہم کیا ہے۔
انہوں نے بتایا کہ جولائی 2022 میں ہماری گزشتہ مخلوط حکومت میں منصوبے کا کنٹریکٹ جنوبی کوریا کی کمپنی کو دیا گیا تھا ، منصوبے پر تیزی سے کام جاری ہے، حکومت میں آتے ہی منصوبے کی پیشرفت کا جائزہ لیا۔ انہوں نے کہا کہ سہولیات کے اعتبار سے یہ پاکستان کا پہلا جدید ترین آئی ٹی پارک ہوگا جس کی صلاحیت سے پورا ملک مستفید ہوگا۔ انہوں نے کہا کہ منصوبے کے معیار سے مطمئن ہوں، یہ خطے کیلئے رول ماڈل ہوگا۔
انہوں نے کہا کہ ٹیکنالوجی پارک سے ملکی آئی ٹی برآمدات میں سالانہ 7کروڑ ڈالر کا اضافہ جبکہ ملازمتوں کے 10ہزار مواقع پیدا ہوں گے۔انہوں نے کہا کہ پارک میں 120 دفاتر ہوں گے جبکہ انکیوبیشن سینٹر میں 15اسٹارٹ اپس ہوں گے۔
انہوں نے بتایا کہ ٹیکنالوجی پارک میں بزنس سپورٹ سنٹر ، ریسٹ ہاؤس، لیول تھری کا ڈیٹا سنٹر بھی قائم کیا جائے گا، یہاں کام کرنے والوں کو تفریحی سہولیات بھی میسر ہوں گی۔انہوں نے بتایا کہ آئی ٹی پارک میں تحقیق و ترقی کیلئے جدید آئی ٹی لیبارٹریز بھی قائم کی جائیں گی۔
انہوں نے بتایا کہ آئی ٹی پارک کی بدولت 250ای روز گار سنٹرز ملک بھر میں قائم کئے جائیں گے۔ انہوں نے کہا کہ کورین کمپنی سے آئی ٹی پارک آئندہ سال جون کی بجائے رواں سال اکتوبر میں مکمل کرنے کی درخواست کی ہے، کوشش ہوگی اس طرح کے جدید آئی ٹی پارک وفاق اور صوبوں کے تعاون سے تعمیر کئے جائیں۔
انہوں نے بتایا کہ رواں سال آئی ٹی کیلئے بجٹ میں 180ارب روپے مختص کئے گئے ہیں جو ملکی تاریخ میں اس شعبے کیلئے سب سے بڑی رقم ہے۔
